6 ka drug pusher ug user tiklo

CEBU, Philippines - Unom ka  tawo  nga naglakip  sa duha  ka babaye ug duha ka menor de edad  ang nasikop ug nasakmitan  og  shabu  ug  marijuana   sa managlahing  lugar  sa dakbayan  sa Sugbo  sa miaging Sabado.

Ang nadakpan  didto  sa  sitio Itom Yuta,   sa barangay Lorega,   mao  si Marivic Himulatan, 47,  ug ang iyang anak nga si Debie Himulatan, 28,   ug  nasakmitan  sila  og upat ka pakete sa shabu   sa alas 8:00 sa gabii  sa  maong  adlaw.

Samtang  sa alas 6:00 ang  takna  sa maong  adlaw, ang  tulo  ka  batan-on  nadakpan  usab  sa kapolisan  sa akto  nga  naghithit ug  didto  sa  eskina  sa mga  dalan MJ Cuenco Avenue ug T. Padilla sa barangay  T. Padilla.

Si Chief Insp. Romeo Santander, hepe sa City Intelligence Branch sa Cebu City Police Office, nagkanayon  nga si Marivic   giila  nga usa ka big-time drug pusher sumala pa sa impormasyon nga ilang nakuha.

Gani  una  nila  kini  masikop,  ila  unang  gilusad  ang  usa ka semanang surveillance  o pagpaniid  sa kalihukan sa maong  suspetsado.

Matud  pa  ni   Santander  nga migamit  sila  og  usa  ka poseur -buyer    ug  sa pagtunol  sa suspek sa  tulo ka paketeng shabu  ngadto sa poseur-buyer   ila dayong   gisikop.

Ang maong shabu nagkantidad og P25,000 sumala pa kang Santander.

Gumikan  sa  pagkasikop  sa  inahan, mihiwasa  sa kasuko  ang anak  niini  nga  si  Debie kinsa naaresto usab pagkalabay sa duha ka oras  kay  nasakmitan  kini  og usa ka paketeng shabu.

Sa laing bahin,  ang  tulo ka  batan-on,   diin duha niini menor de edad,  nadakpan usab human maaktohi nga  naghithit og  linikit  nga   dahon sa marijuana

Si Chief Insp. Aileen Recla, hepe sa Parian Police Station, miingon nga nakadawat sila og tawag bahin sa mga batan-on na nagtapok sa maong lugar ug kadudahan ang lihok.

Girespondehan kini sa polis ug nadakpan si Bander Dela Cruz, 18, ug ang duha ka lain pang mga batan-on nga nag-edad og 17 ug 16 kinsa naaktohang naghithit og linikit nga dahon sa marijuana.

Ang  duha  ka  menor de edad  gisuta pa  sa  Department of Social Welfare and Development (DSWD) 7   kun nakahimo  ba sila og  “act of discernment.

Nadakpan usab si Rolito Caja  kinsa  nasakmitan  usab og   tulo ka paketeng shabu sa laing buy-bust operation didto sa Mohon 1, Barangay Tisa pasado ala 1:00 sa hapon sa miaging Sabado usab. Nagtingkagol na karon sa karsel ang mga suspek samtang gi-andam na sa kapolisan sa kasong paghupot  og ilegal nga druga nga ipasaka batok kanila. (Niña G. Sumacot/WC) (BANAT BALITA)