Montaño molihok alang benepisyo sa mga sundawo ug polis
CEBU, Philippines - Si Retired Maj. Gen. Ramon Montaño mibutyag kagahapon nga silang mga retiradong sundalo ug mga polis wala kahatagi sa hustong benepisyo nga angayan unta nilang madawat. Sa gipahigayong press conference kagahapon sa hapon didto sa Police Regional Office (PRO)-7, si Motaño kinsa usa ka kanhi DILG Undersecretary mipahibawo nga niiining iyang pagkandidato pagka-senador ubos sa Independent party sa umaabot nga election wala siya’y laing tinguha mao ang pag-utingkay niining maong isyu .
Matud pa niya nga kun suwertihon siya ipasalig niya sa mga sudawo ug polis nga madawat nila ang tanang benepisyo nga angay nilang dawaton.
Matud niya nga isip usa ka sundalo ipadayon niya ang iyang pagpakiggiyera batok sa mga kontra sa estado.
Gibutyag ni Montaño nga bilyones ang gigahin alang sa mga pension sa mga retirado sama kaniya apan ang goberno giingong nagdumili sa paghatag kanila niining tanan.
Kini tungod kay wala’y mga magbabalaod nga miutingkay niini busa wala lang usab magtagad ang mga hingtungdang buhatan sa paghatag sa hustong benepisyo ngadto sa mga retiradong sundawo ug polis.
Matud niya nga bisan gani ang mga anaa sa serbisyo karon wala usab makadawat sa hustong benepisyo ug nagkinahanglan kining tanan sa mga nasuhito sa pamaagi sama kaniya aron makapahimus ang maong mga kawani sa kagamhanan kinsa naningkamot pagpanalipod sa nasud aron motunhay ang kalinaw ug kahusay niini.
Tungod niining mahinungdanon niyang misyon gilauman niya nga suportahan siya sa tanang polis ug sundawo sa nasud kay siya’y manglimbasug aron makadawat sila mga butang nga alang sa ilang pamilya.
Niadtong tuig 1991 si Montaño napili nga USEC sa DILG ug nahimong Commanding General sa NCRDC niadtong tuig 1987. Isip Commanding General sa NCRDC siya maoy responsabli sa pagsikop kang Renegade Lieutenant Colonel Gringo Honasan niadtong Disyembre 9, 1987. (WE)(BANAT NEWS)
- Latest
