Rama gikiha ni Ralota sa Ombudsman
CEBU, Philippines - Gitinuod og kiha sa pangulo sa Association of Barangay Captains (ABC) sa siyudad sa Sugbo si Mayor Michael Rama diha sa buhatan sa Ombudsman for the Visayas tungod sa pasangil nga gigamit sa mayor ang pundo sa asosasyon nga walay pananghid kanila.
Matud pa sa pangulo sa ABC dinhi sa dakbayan sa Sugbo nga si Michael Ralota nga dul-an P5 milyones ang budget nga gitagana sa siyudad karong tuiga alang sa ABC apan nakugang na lang sila nga ang P4.5 milyones niini ang giingong gigamit sa siyudad sa pagpamalit og gasolina nga alang man unta kini sa nagkadaiyang barangay busa P500,000 na lang ang nahibilin nga budget sa ilang kapunongan.
Dugang pa ni Ralota nga wala’y pagtugot sa ABC ang gibuhat ni Rama busa gipasakaan gyud niya og reklamo nga technical malversation of public funds sa buhatan sa Ombudsman.
Una na nga gipadayag ni Ralota nga tataw kaayong nag-abusar si Rama sa gahom niini ug lakip usab sa iyang gireklamo ang city budget officder nga si Nimfa Briones.
Nagplano usab si Ralota nga ipadangat usab niya ang reklamo ngadto sa buhatan sa Department of Interior and Local Govenrment.
Una na nga gibutyag ni Ralota nga dili pamolitika ang iyang gibuhat sanglit iyaha ra nga giprotektahan ang interes sa ABC.
Samtang ang mayor mipadayag nga wala siya mahasol sa kiha sa ABC gumikan kay wala siya’y dautang gihimo gumikan kay duna siya’y gahom sa pagamit sa budget alang sa ubang katuyoan.
Nagkanayon ang mayor nga ang maong budget gigamit ra usab alang sa nagkadaiya nga proyekto sa barangay. (BANAT NEWS)
- Latest
