Tulo ka illegal fishers nadakpan sulod sa fish sanctuary sa Sta.Fe

CEBU, Philippines -  Tulo ka mga mangingisda ang gidakop sa mga tanod ug kapulisan tungod sa illegal nga pagpanagat gamit ang compressor og diha sa fish sanctuary sa kadagatan sa barangay Pooc lungsod sa Sta. Fe isla sa Bantayan kagahapon sa ala 1:30 sa kaadlawon.

Ang mga nadakpan tungod sa illegal nga pagpanagat mao sila si Ramon Tomabini, 20, Abel Veligano, 36 , ug Eulalio Tecson, 18,  mga molupyo sa barangay Balidbid, Sta. Fe.

Sila nakuhaan og kapin lima ka kilong isdang mulmol diha sa ilang posesyon ug bangka ingon man compressor nga gigamit nila aron makasalom sa mas lawom nga bahin sa maong dagat.

Matud ni PO3 Marino Cajes sa Sta. Fe Police Station dihang nahinabi sa Banat News ang mga tanod sa barangay Pooc maoy nakadakop samtang nagpahigayon og pagpatrolya.

Matud sa hepe sa tanod nga si Vicente Ilustrisimo sa barangay Pooc dihang nahinabi sa Banat News samtang sila nagpatrolya nabantayan nila ang tulo sulod sa fish sanctuary maong ilaha silang gidakop.

Dugang ni Ilustrisimo ang maong illegal nga panagatan gipanag-iya sa umagad ni Mayor Jennifer Ilustrisimo ang magtiayon nga sila si Renato Esgana ug asawa nga si Babie Tesie Ilustrisimo Esgana.

Matod ni Ilustrisimo naghitak gyud ang illegal nga panagat sa ilang lugar nga nagikan sa lain laing lugar uban sa taga pikas lungsod hinungdan nga gihingusgan nila ang pagpatrolya matag gabii.  (BANAT NEWS)