Simbahan sa Birhen sa Regla adunay bag-ong CCTV cameras

CEBU, Philippines -  Bag-o na ang CCTV camera palibot sa national shrine sa Birhen sa Regla sa dakbayan sa Lapulapu alang sa hugot nga pag-monitor sa palibot nunot sa nahitabong pagpanglungkab sa mga alahas sa birhen kapin usa ka semana na ang nakalabay.

Matud pa ni Fr. Jaime Duero ang Kura Paruko sa Birhen sa Regla National Shrine sa dakbayan sa Lapulapu upgraded nga CCTV camera ang ilang gitaod karon.

Lakip sa kausaban nga ilang gihimo mao ang pagpalig-on sa ilang mga bintana diin gipabutangan kini og grills aron dili sayon nga makalusot ang kawatan. Ang koral palibot sa simbahan gibutangan usab og mga wires aron dili dali nga masaka sa mga dautang elemento.

Gidugangan usab og mga suga ang palibot sa simbahan ug ang mga dapit diin mahimutang ang mga importanteng kagamitan sama sa altar  diin nahimutang ang imahin sa Birhen sa Regla.

Sa pagsusi sa mga tigbalita nasuta nga duna nay mihatag pag-usab sa ilang mga donasyong alahas sa imahen.

Hangtud ning pagsulat sa balita padayon pang nag-imbestigar ang kapolisan sa pagkawat sa kapin usa ka gatos nga bulawang alahas sa Mahal nga Birhen niadtong Nov. 28 ning tuiga.  (BANAT NEWS)