CEBU, Philippines - Naluwas gikan sa mga bala sa kamatayon ang mga tanod ug kagawad sa barangay San Roque, dakbayan sa Talisay dihang gipamusil sila sa mga armadong tawo nga ilang gialarmahan niadtong Martes sa kaadlawon apan mikagar ang mga armas niini busa wala makabuto.
Sila si Kagawad Rafael Chan ug ang mga tanod nga sila si Mario Gino, 48, Henry Patatag, 48, Protacio Camacho, 61, Emeterio Bacalso, 54, Jesus Derecho ug Lyndon Deiparine, pulos hingkod, nakaginhawa og luag dihang nasayran nila nga mipiti lang ang mga armas sa namusil kanila apan walay usa nga nakabuto niini.
Ang mga suspetsado nailhan nga sila si Junry Escaro, 24 , ug ang ginganlan og “Walo”, hingkod, pulos taga sitio Kimba, barangay Cansojong, Talisay.
Si Chan nga nahinabi sa Banat News kagahapon mibutyag nga nakadawat sila og report nga si Escaro napriso na kaniadto sa Talisay City Jail sa Maghaway tungod sa kasong pagpanunggab ug niining ulahi lang, giingong si Escaro ug Walo maoy mga responsabli usab sa mga tulis nga nahitabo sa Cebu South Coastal Road.
Ang duha kinsa padayong gipangita sa mga polis giingong naila nga mga badlongon sa ilang lugar.
Sa wala pa mahitabo ang pagpamusil si Escaro uban sa iyang mga higala giingong naghantak atubangan sa RD Pawnshop nga nahimutang sa eskina San Roque hinungdan nga gibadlong kini sa mga tanod nga nag-roving, apan giingong mihiwasa sa kasuko ang suspetsado .
Mga pipila ka minuto ang nakalabay si Escaro uban sa iyang amahan miadto sa barangay hall ug nanukmat sa tanod hinungdan nga gihusay sila ni Chan.
Human niini ang amahan ug anak nanglakaw apan human sa pila ka minutos ang nakalabay ang mga tanod ug si Chan nakadawat na usab og report bahin sa giingong presensya sa armadong mga tawo hinungdan nga ila kining girespondehan.
Pag-abot nila sa lugar nga giingong nahimutangan sa armadong mga tawo nakita nila si Escaro ug Walo nga nagsakay og motorsiklo ug sa walay igong hinungdan gipamusil sila niini.
Apan matud pa mipiti lang ang gatilyo sa armas sa duha ka suspetsado ug wala gyud makabuto hinungdan nga misirit kini og padagan sa ilang motorsiklo sa kabalaka nga bawsan sila og pamusil sa mga tanod.
Si Chan daling mitawag sa kapolisan ug nangayo og panabang ug mirespondi usab dayon sila si PO2 Jason del Campo ug PO1 Allain Abellanosa apan wala na nila hiabti ang mga suspetsado.
Si Chan midugang nga mopasaka sila og kaso batok sa duha ka mga suspetsado.
(BANAT NEWS)