Hepe ug sakop nga polis nga hubog ug nanapog imbistigahonon

CEBU, Philippines - Misagunto  ang  usa  ka operator ug tag-iya  sa sound system  human  kini dapoga  ug  gimudmod  ang nawong sa computer table sa  usa  ka hubog  nga  polis atol sa pista  sa barangay Poblacion, lungsod  sa Pilar, sa isla  sa Camotes alas 10:00  pasado  sa gabii  niadtong  Lunes.

Samtang ang hepe  sa  kapolisan  sa Pilar mag-atubang  usab  og  imbistigasyon bahin  ning maong  hitabo.

Ang  biktima  nga  si  Jesse Cuizon, hingkod, tag-iya sa sound system  nga  gigamit  sa disco  sa  maong  pista mibutyag  sa Banat News  nga  samtang  nag-operate  siya sa  music,  miduol  ang  polis  nga  nailhan  niyang  si Rolando Florentino, hubog,  ug isog  kaayo  og  dagway,  nga  nangutana  sa  iyang disc jockey  nga  si Datcy Ruchie kanus-a  mahuman  ang  disco.

Matud  pa  ni  Cuizon  nga   tungod  kay  wala  siya matagad ni Ruchie kay  busy  kini  nga  nag-disc jockey,  iyang  giingnan  si Florentino  nga  dugay  pa  mahuman  sir, ang disco .

Apan  matud  pa  ni  Cuizon  nga kalit  lang   mihiwasa sa kasuko ang maong  polis   unya  kalit nga gidakol ang iyang  ulo  ug  dayon gimudmod  ang  iyang dagway  sa computer  table nga  diha  sa iyang  atubangan.

Matud  pa  ni  Cuizon  nga gibati  niya ang hilabihang  kasakit  sa iyang nawong  nga  nabagnos  sa  computer table  ug  tungod  kay  nawala  man  lang  og kalit  ang  suspetsado, iya  na lang gipaabot  ang kabuntagon  aron iyang isumbong sa  polis station.

Hinungdan  nga  kagahapon  sa buntag  nagkaatubang  sila si Florentino  atubangan  ni Police Chief Albert Quilitorio sa  Pilar  Police Station.

Matud   pa  sa biktima  nga  wala pa kaayo mahuwasi  sa kahubog  si Florentino  nga miatubang kaniya  ug  miangkon kini  sa iyang  sayop  ug nangayo  usab kaniya  og pasaylo.

Matud  pa ni Cuizon  nga  iyang  gihangyo  si Quilitorio  nga mapatik  unta  sa police  blotter  ang  maong  hitabo  apan  matud pa mibalibad  kini  kay nahusay  na  kuno  sila.

Gani  matud  pa  sa biktima nga si Mayor Jesus  Fernandez sa Pilar  nga  iyang  gisuginlan  sa maong  kaso, nakurat  ug nagkanayon  nga  kinahanglan  gyud  unta  nga ma-blotter  ang  maong  hitabo  aron may basehan  ang  mga imbistigador  sa Cebu Provincial  Police Office  sa ilang  imbistigasyon nga himoon.

Tungod  niini  mibahad  si  Col. Rodolfo Albotra, imbistigador  sa CPPO  nga  iyang  ipatawag  karong  adlawa  si Quilitorio  ug  sutaon  kining kasoha.

Iyang gibutyag  sa Banat News  nga  dili pa niya ikasulti  kun unsay tukma  nga lakang  nga  iyang himoon  batok kang Quilitorio ug kang Florentino hangtud  nga dili niya masuta  ang tinuod  nga  hinungdan  sa maong  hitabo ug nganong  naghubog-hubog  usab  si Florentino  sa maong higayon. (WC)  (BANAT NEWS)