CEBU, Philippines - Gibutang sa heightened alert ang kapolisan sa Western Visayas nunot sa pag-abot sa bagyong Pablo.
Si Chief Supt. Agrimero Cruz, Jr., ang director sa Police Regional Office 6 (PRO) 6, mimando sa mga sakop nga hingusgan ang seguridad ug pangandam alang sa posibilidad nga pagpahigayon og mga search and rescue operations.
Gipasidan-an niya ang mga hepe sa kapolisan nga makig-alayon kanunay sa mga lokal nga disaster risk reduction management councils ug tabangan sila sa mga plano sa mga pagpangandam.
“Patuloy po ang monitoring na isinasagawa ng ating Regional Tactical Operation Center tungkol sa situation sa mga bayan sa Region 6,” matud pa niya kinsa midugang nga giandam na nila ang mga search and rescue equipment sukad pa niadtong Domingo.
Samtang ang tanang mga mo-duty nga mga polis gimandoang magsuot sa ilang SAR uniforms aron daling makaresponde.
Samtang nanawagan si Cruz sa publiko nga batasanon ang pagtan-aw, pagpaminaw sa mga balita kabahin sa lakaw sa panahon.
“Kailangan po ang bawat isa ay maging mapagmatyag at alerto sa lahat ng oras para maiwasan ang sakuna na dala ng bagyong ito,” matud pa niini. (BANAT NEWS)