Typhoon signals sa Leyte, Southern Leyte gipaubsan

Ormoc City, Philippines – Gipaubos na sa Signal No.2 ang storm warning signal sa Southern Leyte gikan sa Signal No. 3 niadtong Lunes atol sa pagsulod sa bagyong Pablo nga miresulta sa pagkanselar sa mga biyahe sa barko ug panagatan.

Sukad pa niadtong Lunes miabot na sa 3,000 ka pamilya ang gipabakwit ngadto sa nagkadaiyang evacuation centers sa mga lungsod sa Sogod, Padre Burgos, St. Bernard ug Limasawa.

Ang typhoon signal No. 2 sa Leyte gipaubos na usab ngadto sa Signal No. 1 Kagahapon sa alas 11:00 sa buntag apan pabiling suspendido ang klase diha sa Tacloban City ug Leyte.

Samtang ang bagyo mitipas palayo sa Leyte, si Tacloban City Councilor Cristina Romualdez mipasalamat niini  sa iyang Facebook page pinaagi sa pag-ingon: "God is amazing! He answers our prayers. We declared and prayed that the typhoon will not affect Tacloban City. He spared us. Praise God."

Ang mga silingang mga siyudad ug kalungsoran hinuon sama sa Ormoc  pabiling alerto ang mga rescuers sa pag-monitor sa bagyo.  Ang mga sakop sa Philippine Army, Police Regional Mobile Group, 4th Leyte Engineering District ug uban pang hingtungdang mga grupo nagpabiling alerto.

Si Representative Lucy Torres-Gomez (4th district, Leyte) mimando nga monitoron 24-oras ang lihok sa bagyo apan masaligon siyang dili kini moigo sa ilang dapit.

Samtang gidid-an pa gihapon ang mga biyahe sa barko sa Ormoc padulong sa bisan asang bahin sa Central Visayas sugod pa niadtong Disyembre 3.  (BANAT NEWS)