Apostol gibadlong ni Pabling
CEBU, Philippines - Gitambagan ni Deputy Speaker Pablo "Pabling" Garcia si Deputy Ombudsman for the Visayas Pilagio Apostol nga magpakahilum ug dili magpasagad og hatag og komentaryo kalabot sa isyu sa Balili Property.
Matud ni Garcia nga dili angay nga moluwat og mga pamahayag si Apostol kalabot sa Balili property sanglit aduna may nag-ong-ong nga kaso kalabot niini didto sa Sandiganbayan.
Giluwatan ni Garcia ang maong pahimangno ngadto sa Deputy Ombudsman for the Visayas human napatik sa pamantalaan ang pamahayag niini nga interesadong mahibawo ang iyang labaw nga si Ombudsman Conchita Carpio-Morales kalabot sa Balili property ug adunay posibilidad nga mopagawas og cease and desist order ang buhatan ni Morales kalabot sa maong propriedad.
Gihulagway ni Garcia nga dili haum sa usa ka public official ilabina sa usa ka Deputy Ombudsman sa Visayas nga mohimo og pamahayag sa usa ka kaso nga napundo sa Sandiganbayan.
Gitataw ni congressman Pabling nga ang pagbuhi og pamahayag ni Apostol kalabot sa Balili Property posibling gamiton sa ubang mga tawo alang sa ilang kaugalingong personal ug politikal nga interest. (Chester Abadilla/WC) (BANAT NEWS)
- Latest
