Gipareglaha’g luba angol

CEBU, Philippines - Samdan sa liog ug bukton ang usa ka ulitawo nga gipareglahan  didto  sa  barangay Tuburan Sur, dakbayan sa Danao sa miaging  gabii. Ang biktima mao si Nicole Poncem, 20, ulitawo nga taga Pulang Yuta sa barangay Looc sa maong dakbayan samtang   ang suspetsado  giila  usab  nga mao si Nino Mangas, hingkod,  nga taga Tuburan Sur.

Si SPO4 Edgar Gomez sa kapolisan sa maong dakbayan nga nahinabi sa Banat News miingon nga naglakaw ang biktima sa karsada   sa  maong lugar pauli sa ilang  balay.

Apan ang suspetsado nga nasugatan sa biktima   sa  walay igong hinungdan kalit lang milanit  sa  iyang  kutsilyo  ug gidunggab ang biktima sa makadaghang higayon .

Ang biktima nga nagkabuang sa paglikay pagpanagang dali nga nakapangayog panabang sa mga molupyo sa maong lugar nga maoy hinungdan nga mikaratil   og dagan ang suspetsado pahilayo sa maong  lugar.

Dali nga gidala sa mga molupyo sa maong dapit ang biktima ngadto sa Danao Provincial Hospital  tungod sa mga samad nga naangkon sa iyang liog ug bukton.

Matud pa ni SPO4 Gomez nga ang suspetsado   dali  usab  kaayo   nga gidakop sa  mga polis ug gibalhog na karon sa ilang detention cell  samtang  gipaabot  ang  kiha  nga  angay  niyang  atubangon. (Romeo T.  Limpangog/WC) (BANAT NEWS)