Libreng sakay sa traysikol gibalik
CEBU, Philippines - Atol sa pagsaulog sa ika-28th birthday ni Gerard Anthony “Samsam” Gullas niadtong Sabado, Disyembre 1, 2012 gibalik sa kagamhanan sa dakbayan sa Talisay ang libreng sakay sa mga pasaherong mangompra sa merkado sa Lagtang paingon ngadto sa bag-ong merkado sa Lagtang.
Si Samsam kinsa apo ni Kongresista Eduardo Gullas sa unang distrito sa probinsiya sa Sugbo maoy molansar sa pagka-kongresista karong sunod tuig nga piniliay.
Siya ang mopuli sa iyang apohan kinsa maoy kasamtangang kongresista apan mao usab ang mokandidato sa pagka-mayor sa Talisay sa umaabot nga election.
Si Talisay City Administrator Richel Bacaltos nga nahinabi sa Banat News kagahapon mibutyag nga agi og pahinungod sa birthday ni Samsam gibalik nila ang libreng sakay paingon ngadto sa merkado sa Lagtang.
Kahinumdoman nga sa pagbalhin sa merkado publiko gikan sa Tabunok ngadto sa Lagtang niadtong Agosto 2011 ang kagamhanan sa Talisay mitanyag og libreng sakay sa mga pasahero paingon sa merkado sa Lagtang aron lang mahalinan sa ilang mga baligya ang mga vendor sa maong merkado.
Sama kaniadto, ang kagamhanan sa siyudad mikuha og 10 ka traysikol gikan sa naglain-laing rota matag adlaw nga maoy ilang gibayran aron mohakot sa mga pasahero gikan sa Tabunok ngadto sa Lagtang ug vice versa.
Ang maong mga traysikol anha magpundo sa kanhi merkado sa Tabunok samtang maghuwat sa pasahero nga ilang pasakyong libre paingon ngadto sa Lagtang.
Sa samang higayon libre usab nilang ihatud balik sa Tabunok ang mga pasahero nga gikan sa merkado sa Lagtang.
Matud usab ni Bacaltos nga sama kaniadto dunay token nga ihatag ngadto sa mga drayber sa traysikol ug mao kini ilang ipakita ngadto sa in-charge aron makakobra sila sa bayad sa ilang serbisyo.
Si Bacaltos midugang hinuon nga kining libreng sakay sa mga pasahero nga mangompra sa merkado sa Lagtang alang lang kini niining buwan sa Disyembre niining tuiga. (Brenda D. Batuto/WC)
- Latest
