Cebu nangandam na sa supertyphoon Pablo

CEBU, Philippines - Gitinguha karon sa kagamhanan sa dakbayan sa Mandaue nga paspasan  ang pagdemolis sa mga panimalay sa gikonsiderar nga danger zone areas sa siyudad paglikay kanila sa disgrasya nunot sa gipaabot nga pagsulod sa Super Typhoon nga Pablo nga giingong moigo dinhi sa Sugbo karong semanaha.

Niadtong miaging semana 100 ka pamilyang nagpuyo sa daplin sa sapa sa Butuanon River sa  barangay Maguikay ang bulontaryo miguba sa ilang mga panimalay nga kuyaw kaayo nga anoron sa kusog nga bul-og sa tubig sa higayon nga magbaha.

Ang sagad sa mga panimalay nga naepektohan mao ang mga sakop sa Maguikay-Tabok Homeowners Association nga miuyon hinuon sa pagbalhin kanila ngadto sa  6.5 ka ektaryang relocation site nga gitagana kanila sa kagamhanan.

“Nahibalo mi nga anaa sa delikado ang among gipuy-an mao nga maayo na lang nga kami ang moguba aron mapuslan pa namo ang mga kahoy nga among ginuba,” pamahayag  pa ni Abel Tangayan nga maoy presidente sa maong kahugpongan sa mga molupyo sa maong dapit.

Matud pa ni Tangayan  ang mga panimalay nga maapektohan sa pagpangguba mao ang anaa mahimutang sa ilang giila nga wala na mosubay sa 3-meter easement nga maoy gideklarar sa kagamhanan nga danger zone area.

Si Tangayan nga nanimpalad dinhi sa Sugbo sa tuig 1997 nakapalit og balay nga nahimutang sa danger zone area nga  kanhi gipanag-iya ra usab sa iyang uyoan. Kagahapon mipatawag og emergency meeting ang Office of Civil Defense, mga Disaster Risk Reduction Management Councils aron tukion ang pagpangandam sa pag-abot ni Pablo.

Mipasidaan ang mga awtoridad sa mga tawong namuyo sa mga kuyaw nga dapit nga mangandam ug mobiya nalang daan sa ilang mga panimalay kung gikinahanglan aron paglikay sa disgrasya. (Romeo T.  Limpangog/EIM) (BANAT NEWS)