Way shortcut aron mahimong santos

CEBU, Philippines -  Way shortcut aron ma-santos. Kini maoy mensahe ni Cebu Archbishop Emeritus Ricardo Cardinal Vidal sa homiliya niini sa National Thanksgiving Mass ni San Pedro Calungsod nga gitambongan og dul-an usa ka milyon apil na nila ni Presidente Benigno Aquino III ug Bise Presidente Jejomar Binay.

Ang selebrasyon gisaulog ni Vidal inubanan ni Cebu Archbishop Jose Palma  ug 53 ka mga Obispo ug 700 ka mga pari ingon man representante sa Vatican nga si Angelo Cardinal Amato kansang buhatan sa Vatican mao ang Prefect of the Congregation for the Causes of Saints.

 Lakip sa mitambong mao si Archbishop Gaudencio Cardinal Rosales ug ang bag-ong natudlo sa Vatican nga si Manila Archbishop Cardinal Luis Antonio Tagle. Si Vidal nagkanayon nga ang sakripisyong gihimo ni San Pedro Calungsod usa ka matang sa gugma nga sama kang Hesukristo. Matud pa niya maong bisan pipila na ka gatos ka tuig ang milabay nagpabilin si San Pedro Calungsod sa panumduman sa mga tawo.

“San Pedro lives on because he refuses to give up to love…love compels Pedro to die…this is the reason why we honor Pedro’s love,” matud pang Vidal nga ang gipasabot mao ang dakong gugma ni San Pedro Calungsod  ngadto sa Diyos.Sumala pa ni Vidal nga bulahan ang tawong mituo ug mituman sa pulong sa Diyos ug kadtong mituo apan wala motuman sa sugo sa Kahitas-an bakakon.

Matud pang Vidal mao kini ang hinungdan nganong dili sayon aron mamahimong usa ka santo. Samtang wala usab palabya ni Vidal ang paglabtik niadtong mga tawong hiwi ang binuhatan.

“Ang taong biglaang yaman ay taong mabilis ang pagbulusok,” matud pang Vidal.

Ang National Thanksgiving Mass gitapos sa pagkanta sa mga awit sa kapin usa ka libong choir gikan sa nagkadaiyang parokya lakip na niini ang University of the Visayas Choral, ug ang fireworks display nga gipaabot sa mga Sugboanon.  (BANAT NEWS)