Pilgrim center alang sa mgadeboto buksan karong buntag

CEBU, Philippines - Buksan na karong adlawa sa alas otso sa buntag ang San Pedro Calungsod Pilgrim Assistance Center nga nahimutang diha sa Campania Maritima.

Mao kini ang magsilbing kapahuwayan sa mga motambong sa National Thanksgiving Mass ni San Pedro Calungsod diha sa South Road Properties (SRP) karong hapon.

Sumala pa ni Mayor Michael Rama nga lahi ang pilgrim center sa naandan na nga devotee city matag Sinulog sanglit holding area lang kini sa gusto moadto sa site sa SRP. Mamahimong makapahuway ang mga deboto nga motambong sa Santos nga Misa ug moabot ngadto sa 3mil ka mga tawo ang gipanglantawan nga masulod sa maong pilgrim center.

Butangan kini og bangko nga kalingkuran ug mga portalettes, telebisyon, wi-fi, medical service ug tubig.

Gibutyag usab ni Konsehal Roberto Cabarrubias ang tsirman sa committee on pilgrims nga gamit usab kaayo ang maong pilgrim center gumikan kay naa kini live streaming gikan sa mga panghitabo gikan sa SRP.

Matud pa sa konsehal nga wala’y katulganan ang pilgrim center apan mahimo nga moistar ang mga debotos sa tent ug magdala sila og kaugalingon nila nga higdaanan.

Dugang pa ni Cabarrubias nga ang nahisgutang area gamiton hangtud sa Sinulog sa sunod tuig kung diin ipahimutang usab ang mga container vans alang sa tukorong Devotee City. (/EIM) (BANAT NEWS)