Lima ra ka barko ang mokuyog sa fluvial
CEBU, Philippines - Sirad-an ang Mactan Channel sugod karung ala 1:30 sa hapon hangtud sa alas 4:30 karong adlawa ang takna aron pagsiguro nga dili mabalda ang pagpahigayon sa fluvial procession ni San Pedro Calungsod nga manukad sa Ouano Wharf hangtud sa Kawit Island sa habig sa South Road properties kon SRP alang na sa pagahimoong National Thanksgiving Mass sa templete diha sa SRP.
Matud ni Cebu Coast Guard Commander Rolando Punzalan dihang nahinabi sa Banat News niadto pang niaging semana nihatag sila og abiso sa tanang mga shipping companies aron maka-adjust kini sa ilang mga schedule sa biyahe.
Gihimo kini ni Punzalan aron pagsiguro sa hapsay ug luwas nga fluvial procession ug aron malikay sa posibling disgrasya sa kadagatan atol sa maong kalihukan.
Hinuon matud ni Punzalan nga sukad kagahapon sa alas 12:00 sa udto pagtak-op sa registration lima ra ka mga barko ang nakaparehistro nga mosalmot sa fluvial procession.
Apan matud niya nga wala kini problema tungod kay moabot man usab og kapin sa 30 ang mga sakyanan sa Philippine Navy ug Coast Guard nga mokuyog sa fluvial procession nga magbahasbahas sa dagat isip mga marshals.
Nagkanayon si Punzalan syento porsiyento na silang andam alang sa pagpatuman sa kahapsay ug kalinaw sa pagahimuon nga fluvial procession karun ala 1:30 sa hapon.
Pagkahuman isunod ang National Thanksgiving Mass diha sa templete ni Calungsod sa SRP nga gipaabot nga tambungan sa gibanabanang kapin sa usa ka milyon ka mga debotos nga pangulohan ni Presidente Benigno Aquino III ug Bise Presidente Jejomar Binay ug mga dignitaries ug kadagkuan sa mga kaparian sa simbahan dinhi sa nasud. (BANAT NEWS)
- Latest
