Payag gidaoban sa anak sa tag-iya ugdaw

CEBU, Philippines - Naugdaw  ang  usa ka payag  human  kini  unaya  og  sunog  sa  anak sa  tag-iya  niini   kay  nasuko  nga  wala  hatagi  og  kuwarta   didto sa barangay  Mabuli, lungsod  sa Tabogon  niadtong  Lunes  sa   hapon.

Ang naugdaw nga payag  gipanag-iya  sa  magtiayong  Ceriaco Claves ug Lolita Claves,  mga hingkod   na  og  edad  nga  nagpuyo  sa maong  lugar  kinsa  adunay siyam ka mga anak.

Samtang ang gitumbok nga suspek mao ang anak niini nga si Tony Claves, 25, ulitawo,  apan adunay kapuyo .

Si PO3 Alman Acabal sa Tabogon Police Station  mibutyag  sa Banat News  nga ang suspek  nga  nagpuyo  sa kasikbit  ra  nga  barangay  miduaw sa  pinuy-anan  sa iyang  ginikanan   kay  nanghangyo  og  kuwarta  kay  gastohon  kuno  niini  sa talianak  niyang  kapuyo. 

Apan tungod kay naglisud usab ang mga ginikanan   gibalibaran kini   nga  maoy  naingnan  sa  kasuko   sa suspetsado  ug  mihiwasa  kini  pag-ayo  hangtud  nga  mikuha  og  pusporo, dayon gidusliban ang   bongbong sa  payag  sa iyang  ginikanan.

Gumikan  sa  kagaan  og  mga  dapat  niini   dali  ra kaayong  naugdaw  nga wala  na  hiabti  sa mga  bombero.

Hinuon  nasikop  dayon  sa kapolisan  ang  suspek aron panubagan  ang  kasong  arson  nga  iyang  atubangon  sa hukmanan.

Apan  dihang  nakahukom  ang  mga  ginikanan  nga  dili  na lang  sila  mopasaka  og  kiha  batok  sa ilang anak, gibuhian  kini  sa kapolisan  ug  wala  na  itanggong  sa prisohan.

Gibana-bana  nga  mikabat  og  P5 mil  ang  kantidad  sa kadaot  sa maong  sunog.( WC) (BANAT NEWS)