Mga karo ihan-ay sa Talisay Fish Port

CEBU, Philippines - Si Monsignor Ruben Labajo sa Saint Joseph Parish Church sa Tabunok, dakbayan sa Talisay  miawhag  sa  tanang  pari  sa habagatang bahin sa lalawigan  nga motabang  sa pag-atiman  sa  mga  karo  aron  ikahatod   na  kini  ngadto   sa Talisay City Fish Port sa Cebu South Coastal Road  sa barangay Tanke   karong  adlawa, Huwebes.

Si Msgr. Labajo  kinsa  maoy  area coordinator  sa thanksgiving  mass alang  sa habagatang  bahin  sa lalawigan  nagkanayon nga ang mga karo kinahanglang   puno  na   sa adorno  nga  moabot  didto  sa maong  lugar.

Gilauman  nga  may 32 ka mga karo gikan sa habagatang bahin ang mosalmot sa prosesyon ug sa alas 8:00 sa buntag  ugma  ug kinahanglang maglaray na   ang tanan  sa  south coastal road (SCR)  tungod kay sa alas 9:00 sa buntag gikatakda kining susihon sa kapolisan alang sa siguridad.

Gibutyag ni Msgr. Labajo nga ang prosesyon  magsugod  sa ala 1:00  sa  hapon  ugma apan  adunay posibilidad nga masayo kini   kay sa gitakdang oras kay  mag-agad  lang  kini  sa gidaghanon sa bul-og sa  mga  tawo.

Giawhag usab ni Msgr. Labajo nga kadtong mga ulahing maabot  kun makalakaw na ang grupo sa ilang parokya anha na lang sila  mokuyog sa ulahi  nga  bahin   sa prosesyon.

Ang matag parokya adunay  mga numero nga gi-assign ug kadtong gustong mouban sa prosesyon nga parokyano mangutana lang sila sa ilang Padre Kura bahin niini.

Hinuon  sa  dapit sa eskina  sa sitio Laray, San Roque adunay mga communicator ug  mga enforcer  nga mahimong   pangutan-on  bahin sa han-ay sa prosesyon tungod kay gilakbit saysayan   na sila niini aron ang mokuyog sa prosesyon dili masaag.

Si Labajo nagkanayon nga sila sa habagatang bahin 99 porsyento na  sa ilang pagpangandam alang sa prosesyon ug karong  buntag .

Gitakda  usab  ang  usa ka final briefing  sa kapolisan, traffic enforcers ug uban pang mga hingtungdan  sa Talisay City Sports Complex sa barangay Poblacion  alang  sa hingpit  nga seguridad  sa  thanksgiving  mass. (WC)(BANAT NEWS)