CEBU, Philippines - Nagkalalis na usab sa ikaduhang higayon sila si Mayor Michael Rama ug kanhi kongresista Raul del Mar atol unta sa miting sa Cebu City Development Council (CCDC) kagahapon. Wala hinuon mahinayon ang maong miting tungod kay wa ma-quorum ang grupo.
Nahitabo ang panaglalis nila ni del Mar ug Rama dihang sa pag-roll call, mireklamo si del Mar kay wala masangpit ang iyang ngalan.
Apan dali siyang gibadlong ni Rama kay kuno nakasupak sa reglamento kay dili man siya membro sa CCDC. Apan miinsister ang kanhi kongresista nga siya maoy representante sa iyang anak nga si Kongresista Cutie del Mar.
Didto miinit ang lalis sa duha kay dili man gyud mosugot si Rama nga misangpot sa pagka-undang sa maong miting.
Mikulisiw si del Mar sa kasuko kay matud pa niya sa nanglabay nga mga miting nila gitugotan man siya nga makatingog apan kagahapon naunsa mang pagkaunsaa nga gipugngan man siya ni Rama.
Apan si Rama midepensa pinaagi sa pag-ingon nga igo ra siyang mituman sa ilang balaod ug dili niya kini angay nga supakon.
Kahinumdoman nga ikaduha na kini nga higayon nga naglalis sila si del Mar ug Rama. Una niini mao ang nahitabo sa miaging buwan diin mikisi-kisi usab si del Mar kay wala man hisgoti ni Rama ang bahin sa iyang (del Mar) proyekto nga flyover.
Apan matud pa ni Rama nga wala niya kahisgoti ang maong isyu tungod kay wala kini sa agenda sa miting ug labaw sa tanan supak siya sa maong proyekto.
Sumala pa ni Rama nga angay gyud unta nga paminawon ni del Mar ang tingog sa katawhan ug dili niya ipamugos ang flyover kay matud pa sa mayor nga maghatag kini og dugang suliran sa trapiko sa syudad. (BANAT NEWS)