Molupyo boluntaryong moguba sa ilang balay

CEBU, Philippines -  Gusto sa  mga  sakop sa urban poor   nga kapunongan   sa dakbayan sa Mandaue   nga sila na  ang  boluntaryong  moguba sa ilang  mga  balay  nga nahimutang  sa mga peligrong  lugar  sa maong  dakbayan.

Ang  maong  mga molupyo  mao  ang nahimutang  sa  Mahiga Creek sa barangay Subangdaku, sitio Orel sa barangay Banilad, barangay Paknaan ug Butuanon River sa barangay Maguikay.

Gipalanog  usab  sa mayoridad  sa mga hingtungdan  nga  andam  silang  mobalhin  ngadto  sa relocation  site  nga gitagana  alang  kanila  didto  sa barangay  Pacnaan.

Si Ma. Luisa Lacuna nga maoy presidente sa Saint Michael Home Owners Association  sa Philcadan sa barangay Banilad   atol  sa press conference miingon nga 100  sa 145  ka mga sakop  niya sa maong  kapunongan  ang  mitanyag nga  andam  sila  nga  mobalhin  sa relocation  site.

Apan  ang  45   niya  ka sakop  dakong  supak  kay  gusto  silang anha  magpakamatay  sa gipuy-an  nila  karon.

Sayo  niini  mihimo  og pasidaan  ang  kagamhanan  sa Mandaue  ngadto  sa nanimuyo  sa  mga  lugar  nga gitawag  nga danger zone  nga pabiyaon  sila  gikan  sa maong  mga  lugar  tungod   sa ka-peligro  sa ilang  kinabuhi  ug kabtangan  sa panahon  nga  mokusog  ang  uwan ug  mobaha.

Apan  ang  ubang  mga  molupyo  nanumpa  nga  pakamatyan  nila ang  mga  dapit  nga  ilang  gipuy-an  karon  kay  gidebuenas  sila  sa ilang  panginabuhi  ilabi na  nga  dagko  ang  madawat  nila  nga abang  sa  gipaabangan  nilang  mga  balay matag  buwan. Si Jonathan Rom sa sitio Orel sa barangay Banilad   mibutyag  usab nga walo   sa 50 niya ka mga kauban sa ilang home  owners association   nanumpa  nga  dili  mokuyog   ngadto  sa relocation site  nga  gigahin  sa kagamhanan  alang  kanila.

Hinuon  gusto  lang  silang   mamauli sa ilang lalawigan apan mangayo lamang sila og financial assistance gikan sa kagamhanan sa Mandaue.      

Si Cynthia Suico nga maoy Community Affairs officer sa Housing on Urban Development Organization nagkanayon  nga  sa relocation  site  may  gitukod  na  karon  nga  49 ka mga konkreto nga   mga balay   nga gitakda nga subhan  karong  Disyembre 8, 2012.

(BANAT NEWS)