Mieskapong drug suspect sa Tuburan nia magtago sa Cebu City ug Mandaue City

CEBU, Philippines - Gipalapdan pa karon sa kapolisan ang pagpangita sa mieskapong mga drug suspects gikan sa karsel sa kapolisan sa lungsod sa Tuburan niadtong Sabado sa kaadlawon samtang kasong administratiba ang nagpaabot sa pito ka mga polis nga nag-duty nianang adlawa.

Gikatakdang imbestigahon sila si SPO1 Edsel Condevillamar; PO3 Junyl Ater; PO3 Camilo Abaquita; PO3 Jeremias Awit; PO1 Matt Jullibi Roco; PO1 Jezrel Perigo; PO1 Alpeche Manggaron kinsa gipangayoan na og eksplinasyon kun nganong naeskapohan sila nila ni Jenard Magpuyo ug Danilo Navarro. Matud pa ni PO3 Yuri Colonia sa Tuburan Police nga ang ilang labaw nga si Insp. Welther Grapa maoy nagmando sa pito nga moduso sa ilang eksplinasyon aron masayran kon aduna ba gyuy lapso silang nahimo. Si Grapa mimando na nga palapdan pa ang pagpangita sa duha ug apilon na dinhi sa Cebu City ug Mandaue City. “Akong gipadaganan ngadto bisan ug ingnon nato nga naa lang gihapon sila sa among area (Tuburan) pero manigurado lang ta,” matud pang Grapa.

“Maningkamot mi kutob sa among mahimo nga madakpan ni sila,” dugang pa niini.

Si Police Regional Office (PRO)-7 director Marcelo Garbo Jr., mimando na kang Cebu Provincial Police Office director Patrocinio Comendador nga mohimo og lawom nga imbestigasyon sa nahitabo. (Lesley Caminade ug Ria Mae Booc/EIM)(BANAT NEWS)