ABC mokiha ni Rama tungod sa budget

CEBU, Philippines - Mag-atubang unya og kiha diha sa Ombudsman for the Visayas gikan sa Association of Barangay Captains (ABC) sa siyudad sa Sugbo si Mayor Michael Rama gumikan sa pasangil nga paggamit niini sa pundo sa asosasyon nga walay pananghid.

Sumala pa sa pangulo sa ABC dinhi sa dakbayan sa Sugbo nga si Michael Ralota nga P5 million ang budget  nga gitagana sa siyudad karong tuiga apan nakugang na lang silang ang P4.5 milyones niini ang giingong gigamit sa siyudad sa pagpamalit og gasolina nga alang man unta kini sa nagkadaiyang barangay busa P500,000 na lang ang nahibilin nga budget sa ilang kapunongan.

Matud pa niya nga wala’y pagtugot sa ABC ang gibuhat ni Rama busa pasakahan gyud niya og reklamo ang mayor og technical malversation of public funds ngadto sa buhatan sa Ombudsman .

Nagkanayon si Ralota nga tataw kaayo nga nag-abusar si Rama sa gahom niini busa pasakaan usab niya kini og kasong abuse of authority ngadto sa buhatan sa Department of Interior and Local Government.

Dugang pa niya nga ireklamo usab niya si Rama ngadto sa buhatan sa presidente sa  nasud.

“Ato gyud ning tinud-on aron makahibalo ang ubang barangay nga gituok na ta niya (Rama),” sumala pa ni Ralota kinsa kandidato usab pagka-konsehal sa north district ubos sa Bando Osmeña Pundok Kauswagan nga gipangulohan sa kaatbang ni Rama nga si Kongresista Tomas Osmeña.

Nangangkon si Ralota nga dili pamolitika ang iyang gibuhat sanglit iyaha ra nga giprotektahan ang interes sa ilang kapunongan.

Nadismaya siya pag-ayo gumikan kay gitagana unta sa ABC ang maong budget alang sa pagpamalit nila og mga ligid sa mga sakyanan sa barangay.

“Gamit unta kaayo ang garbage trucks  gumikan kay mao na ang himoong back-up  kung dunay maguba nga mga garbage trucks sa barangay,” matud pa ni Ralota.

Samtang si Rama mipadayag kagahapon ngadto sa mga sakop sa media nga iyaha una nga patun-an ni City Administrator Jose Marie Poblete ang isyu nga gibato ni Ralota batok kaniya busa dili pa siya kahatag og detalyadong tubag kalabot niini. (BANAT NEWS)