Giaway sa kapuyo busa naghikog

CEBU, Philippines - Nalandig sa tambalanan ang usa ka helper  sa shop  human kini  mapakyas sa paghikog  didto  sa sitio Caduloy,  barangay Tisa, dakbayan sa Sugbo, kagahapon  sa kaadlawon.

Si Sherwin Corvet Tanchavez, 32, molupyo sa maong lugar kinsa  usa ka  helper  sa machine shop nagbitay  na  sa  sagbayan  sa  usa ka payag  nga  walay  tawo  dili  layo  sa ilang balay.

Ang  kapuyo  niini   nga si Liezel TimTim Pescante  maoy  nakasalbar  sa  iyang  bana  pinaagi  sa pagtangtang  gilayon sa  telephone  wire  nga  gibalikos  na  sa liog  niini  ug  ang tumoy  didto  igaid  sa sagbayan  sa payag.

Sa  imbistigasyon  sa kapolisan  nasuta  nga  mipauli  si Tanchavez  sa ilang  balay  nga  hubog  sa maong  kaadlawon  gikang  nag-inom  uban  ang  iyang  mga barkada.

Gumikan  tingale  kay  nagsipok  ang  ulo sa   kapuyo, nasuko  kini  ug  nagkalalis  sila, apan  sa tantong  debate,  milakaw  kuno si Tanchavez  ug  gibiyaan  ang  asawa  nga nagpunay  og yawyaw.

Tungod  sa kabalaka  sa  iyang  bana,  giapas  kini  sa kapuyo  basin  pareglahan  unya kini ilabi  na   nga alas 3:00  pa baya  sa kaadlawon niadtong  tungora, apan  puwerting  kurata  sa asawa   dihang maoy  misugat  sa iyang  mga  mata ang  nagbitay na  niyang  bana.

Si SPO1 Ruth Violanggo sa Homicide section  sa kapolisan  sa Labangon nagkanayon  nga  human  makapangayo  og  tabang  gikan  sa mga  silingan  nahatud  ngadto  sa  Cebu City Medical Center   si Tanchavez.

Matud  pa  ni  Violanggo nga posibling  dili planado ang  maong lakang  sa  paghikog sa biktima tungod kay wala  man  kini magbilin og suicide note. (Lesley Caminade-Vestil/WC) (BANAT NEWS)