Anak sa kapitan gipatay

CEBU, Philippines -  Maayong pagkabuslot sa ulo ug dughan sa usa ka anak sa kapitan human kini gipusil patay sa duha ka lalaking nagmotorsiklo pasado alas- 8 kagahapon sa buntag diha sa national highway sitio Tapon,  barangay Tinaan sa syudad sa Naga.

Ang biktima nailhan nga si Crisanto Cabisares, 42, taga barangay Cabungahan sa maong siyudad  samtang ang mga mamumuno gihulagway lang nga duha ka lalaking nagmotorsiklo.Sapaisunang imbestigasyon sa kapolisan nasayran nga ang biktima pauli na sa ilang panimalay sakay sa iyang motorsiklo apan pag-abot niini sa maong lugar gituparan kini sa iyang motorsiklo sa laing motor nga adunay sakay nga duha ka lalaki.

Gikatahong gisangpit pa sa mga criminal ang biktima sa pagtawag kaniya og “Joel” ug sa paglingi sa biktima u gipaulanan kini dayon og bala sa mamumuno. Ang biktima daling gitabang sa mga molupyo sa maong lugar ug gidali pagdala sa Minglanilla District Hospital human nakaangkon kini ug samad pinusilan sa iyang ulo ug dughan apan gideklarar kini nga patay na.

Matod pa ni PO3 Renberto Empeynado sa Naga Police nga ang amahan niini mibutyag nga nagpa-blotter na ang biktima sa ilang buhatan niadtong buwan sa Septiyembre tungod sa nadawat niining mga death threats.

Ang biktima giingong adunay gikalalis nga tawo pipila na ka buwan ang milabay ug giingong gihulga kini nga patyon.

Nakuha sa crime scene mao ang duha ka bala sa kalibre .45 nga posibling maoy gigamit sa mamumuno. (EIM) (BANAT NEWS)