Saturation drive himuon sa dili pa ang Thanksgiving Mass

CEBU, Philippines -  Ang kapolisan sa dakbayan sa Talisay mopahigayon og saturation drive sa mga lugar sa siyudad sa dili pa ang adlaw sa National Thanksgiving Mass karong Nobiyembre 30, 2012 ni San Pedro Calungsod.

Sa habig sa habagatan ang dakbayan sa Talisay  maoy “starting point” o anha magsugod ang prosesyon sa mga debotos gikan sa amihanan paingon ngadto sa templete sa South Road Properties. Sa tungang gabii sa Nobiyemre 29 ang tibuok South Road Property siradohan na kini.

Ang hepe sa Talisay City Police Station nga si Superintendent Eddie Recamara nagkanayon nga i-implementar nila ang higpit kaayo nga siguridad atol sa maong kasaulogan.

Gibutyag sa hepe nga mopahigayon sila og mga saturation drive ug higpit nga mga checkpoints diha sa kadalanan usa ka semana sa dili pa ang pagpahigayon sa thanksgiving mass aron ang mga badlongon dili kini makaporma sa ilang mga plano paggama og krimen.

Matud ni Recamara nga sa Talisay halos perpekto na ang ilang security plan alang sa kasaulogan.

Karong Nobiyembre 29 gikatakdang 100 ka mga polis nga augmentation force gikan sa provincial headquarter ang moabot sa dakbayan sa Talisay. Si Recamara nagkanayon nga higpit nilang gidid-an ang mga vendor nga magpundo ug maninda diha daplin sa karsada tungod kay gawas nga makahatag kini og kasamok sa dagan sa mga sakyanan posibleng pundohan kini sa mga badlungon.

Si Recamara nanawagan usab sa gustong motambong nga unta dili na lang magdala og mga bata ug mga tiguwang nga dili na makasugakod sa kainit tungod kay delikado kining makuyapan o atakehon sa sakit.

Gawas niini laing panawagan sa hepe sa publiko nga unta kadtong motambong dili mobiya sa ilang mga balay kung walay mahibilin aron dili sila mabiktima sa mga badlongon ilabi na sa mga kawatan. (/EIM) (BANAT NEWS)