Survivor sa miulbong oil rig sa Gulf of Mexico nakauli na

CEBU, Philippines -  Nakauli na dinhi sa Sugbo ang usa sa mga survivor sa miulbong oil rig flatform sa Gulf of Mexico sa Lousianna sa Estados Unidos niadtong milabay’ng semana nga mikalas og mga kinabuhi ug miangol sa mga trabahante.

Si Paulino Obenieta kinsa gisugat sa mga tigbalita diha sa Mactan Cebu International Airport kagahapon mibutyag nga kauban sila og nahimutangan sa padayong missing nga OFW nga si Jerome Malagapo. Si Malagapo taga siyudad sa Danao.

Matud pa ni Obenieta nga nasalbar lang sila tungod sa nakaali nga laing tangke atol sa pag-ulbo. Si Malagapo matud pa niya duol ra sa miulbong tangke atol sa pagkahitabo.

Midugang si Obenieta nga gipahunong na sa kompanyang Black Elk Energy ang pagpangita sa mga na-missing. Ang maong kompanya maoy tag-iya sa oil rig nga ilang gitrabahoan.

Apan ang representante sa DNT Offshore Crewing Services nga ahensyang gitrabahoan sa duha nga si Edmundo Maxilom Jr. sa report sa News5 mipasalig nga ilang tabangan ang mga banay sa biktima ug dili sila mohunong sa pagpangita kang Malagapo tungod kay nagtuo gihapon silang buhi pa kini.  (BANAT NEWS)