Ambush!

CEBU, Philippines -  Tulo ang naangol duha niini anaa sa kritikal nga kahimtang apil na ang drayber sa multicab dihang gituparan sila sa duha ka mga lalaking nagsakay og motorsiklo ug kalit namusil samtang nagdagan diha sa highway sa barangay Colon siyudad sa Naga kagahapon sa  ala 1:00 sa kaadlawon.

Ang mga biktima mao ang drayber sa multicab pick up nga si Russel Aventajado, 30, taga Calajoan lungsod sa Minglanilla, ang laing biktima mao ang iyang pasahero nga sila si Carlito Uracoy, 31, taga Ward-2 Minglanilla ug Herlan Eclunar, 36, taga Ward-2 Minglanilla.

Matud ni PO2 Dionisio Traumata sa Naga City Police dihang nahinabi sa Banat News sakay sa maong multicab ang mga biktima pauli na sa lungsod sa Minglanilla.

Apan pag-abot nila sa maong lugar kalit lang nibutho ang nagmotor nga mga lalaki ug mitupad kanila samtang nagdagan ug kalit nga gipaarakan sa nag-angkas gamit ang wala matinong kalibre sa armas.

Ang drayber naigo sa iyang bukobuko, walang bahin sa ulo ug tuong dughan apan nakahimo pa kini og maneho hangtud sa atubangang bahin sa Kepco diin dunay mga gwardiya.

Ang mga mamumuno daling mipasirit palayo. Samtang ang duha ka mga pasahero ni Aventajado nga si Urocay naigo sa walang bahin sa ulo, walang paa ug kamot samtang si Enclunar naigo sa walang bahin sa abaga ug hawak.

Ang mga biktima daling gihatud sa South General Hospital sa siyudad sa Naga apan gibalhin  sa tambalanan dinhi sa dakbayan sa Sugbo, duha kanila ang talandugon ang kahimtang tungod sa mga pinusilan sa ulo.

Wala pa matino sa kapolisan ang motibo sa pagpamusil ug padayon pa nila kini karong gisubay ang background sa mga biktima pagtino kung duna ba silay mga nakaaway sa nangaging mga adlaw.  (BANAT NEWS)