Tighimo og fake money nakapiyansa
CEBU, Philippines - Nakapiyansa na ang magpapatigayong gipasanginlang tighimo og peke nga salapi lakip na dolyares kagahapon.
Si Richard Uy, 64, nga taga Univelle, Barangay Kasambagan, Cebu City mibutyag sa mga tigbalita nga wala siya’y laing gustong buot himuon human sa pagkadakop kaniya kondili ang makauli sa ilaha. Si Uy gidala sa mga sakop sa National Bureau of Investigation (NBI)-7 sa Palace of Justice diin siya mibutang og piyansa sa tulo ka mga kasong gisang-at sa NBI batok kaniya.
Si Prosecutor Van Russel Inopiquez mi-indict kang Uy sa kalapasan niini sa Section 166 sa Revised Penal Code o tampering of Philippine bills ug two counts sa paglapas sa Section 168 of the Revised Penal Code o illegal possession and intent to use fake money.
Gimando ni Inopiquez ang piyansang P24,000 sa kalapasan sa Section 166 ug P24,000 nga piyansa sa matag usa ka paglapas sa Section 168 sa Revised Penal Code. Si Uy nakabutang og surety bond sa maong tulo ka kaso ug temporary nang gawasnon.
Kahinumdoman nga nadakpan si Uy sa grupo ni Atty. Bernard dela Cruz sa usa ka entrapment operation niadtong Martes sa hapon ug nakuhaan og P500,000 nga mini nga kwartang Pilipinhon, mga computer units, ug printers.
Usa ka Neil Herrera ang mireklamo ngadto sa NBI nga nakadawat og pekeng kwarta gikan sa suspek hinungdan sa gilusad nga operasyon batok kang Uy. (BANAT NEWS)
- Latest
