TRO nalay makasalbar sa mga telcos
CEBU, Philippines - Wala nay lain pang mahimo ang mga telecommunications companies kundili kini makakuha og temporary restraining order gikan sa korte aron mapugngan ang kamandoan sa National Telecommunications Commission kanila nga reimburse ang tag 20 sentimos nga sobra ra sa ilang gisingil matag text nga gimando niadto pang Disyembre 1, 2011.
Si NTC Director Edgardo Cabarios sa report sa GMA News Online nga bugtong pamaaging madangpan sa mga telcos mao ang legal nga proseso.
Kini nagpasabot ang pagkuha og TRO aron kapugngan ang kamandoan.
Kahinumdoman nga niadtong Martes gimando sa NTC ang pag-uli sa 20 sentimos matag text sa mga subscribers og cellphone nga sobra sa gimandong 80 sentimos nga bayad sa matag text.
Nasayran nga bisan pa man sa kamandoan niadtong Oktubre 2011 nagmagahi gihapon ang mga telcos pinaagi sa pagsingil og piso matag text.
Hinungdan nga niadtong Disyembre 1,2011 subling gipagawas ang kamandoan apan hangtud karon wala gihapon motuman ang mga telcos. Ang pagpaubos sa presyo sa matag text natigayon human sa pagpaubos sa interconnection charges sa text messaging gikan sa 35 sentimos ngadto na sa 15 sentimos.
Wala usab hatagi og gibug-aton ni Cabarios ang pangangkon sa mga telcos nga naka-save na ang mga subscribers pinaagi sa mga promos nga gihatag tungod kay matud pang Cabarios wala kini mabatyagi sa subscribers.
Hinuon giklaro ni Cabarios sa maong report nga dili tanang prepaid SIM card owners ang makabenepisyo sa bag-ong kamandoan. Kini tungod kay kung wala na kini gamita sulod sa unom ka bulan o ba kaha giilisan na og laing SIM card dili na kini makabenepisyo pa sa reinbursement.
Matud pang Cabarios ang mga telcos mo-recycle sa mga SIM card numbers ug ang mahitabo lain na ang nanag-iya sa maong number ug maoy makabenepisyo.( EIM)(BANAT NEWS)
- Latest
