Visayas may igong supply sa kuryente

CEBU, Philippines - Ang mga residente sa Kabisayaan gilaumang makabaton og tukmang suplay sa kuryente tungod  kay  may reserba kining supply nga  mokabat  og 429MW  sumala sa Department of Energy (DOE)-Visayas Field Office

Sumala pa ni Engr. Rey Maleza, supervisor sa Energy Industrial Management Division sa DOE-Visayas nga ang katibuk-ang demand sa kuryente sa taga rehiyon 6, 7 ug 8 mao  ang 1,489MW base  sa record niadtong   Agosto 16 ning tuiga samtang 1, 044 usab ang minimum nga panginahanglan niini nga natala niadtong Abril 6, ning tuiga.

Gipasalig  ni Maleza nga ang 1,869MW maoy maximum nga kapasidad sa elektrisidad nga  gikinahanglan  sa Kabisayaan busa gireserbahan kini  og  400MW kapin.

Si Maleza atol sa bag-ohay lang Energy Lecture 101 Series on Renewable and Electric Power Industry sa syudad sa Sugbo mipresentar sa sitwasyon sa elektrisidad sa Kabisayaan.

Apan ang mga opisyales sa DOE miingon nga nagkinahanglan pa gayud og 150MW nga kapasidad sa kuryente sa tuig 2015  ang Kabisayaan gumikan  sa misulbong nga patigayon   sulod ning  maong  rehiyon.

Labaw  sa tanan  pangandaman  gayud  og  dugang  supply  sa kuryente  kining laraw nga pagtukod og Mega World sa Ayala Business Group sa syudad sa Iloilo.

Matud pa ni Maleza nga ang dugang 50MW nga kapasidad sa elektrisidad kinahanglan gayud ning  maong rehiyon sugod sa tuig 2016 aron tugbangan ang nagkataas nga demand  sa elektrisidad  dinhi.

Gipadayag ni Maleza nga  sa tuig 2030  nagkinahanglan  kining  tulo ka rehiyon  sa Kabisayaan  og 1,700MW.

Ang dugang kapasidad sa elektrisidad nga magsugod sa umaabot  nga mga tuig gibase sa 4.52 porsiyento nga demand rate sa  mga  tiggamit  og elektrisidad dinhi  sa rehiyon  sumala  sa  DOE-Visayas.( WC) (BANAT NEWS)