Pista sa Lapulapu malinawon, usa napusilan

CEBU, Philippines - Malinawon ang piyesta sa Mahal nga Birhen sa Regla sa dakbayan sa Lapulapu karong tuiga  kay  usa  ra  ka  kaso  sa pamusil  ang  natala  sa blotter  sa kapolisan   didto  sa Sacred Heart Village sa barangay Gun-ob sa maong dakbayan atol  sa maong  pista

Si PO3 Lydo Pinos sa homicide section sa kapolisan sa maong dakbayan miila sa biktima nga mao si Joseph Suralta dela Pena, 26 , minyo, samtang  ang  suspetsado  nga  mipusil  mao   si Michael Gloria Talledo, 33, minyo nga silingan usab niini.

Matud pa ni PO3 Pinos nga nag-inom ang biktima ug  ang laing silingan nga si Danilo Degolacion.

Dugang pa ni PO3 Pinos nga dihang nakita sa suspetsado si Degolacion nga  iyang  kontra,   giduol  kini  og  gipusil.

Apan  tungod  kay  nakabantay  si Degolacion abtik  kining  mihupo  dayon  dagan  pahilayo  sa maong  lugar.

Apan gipasundan  og  pusil  sa suspetsado  apan  ang bala  niini  didto  motapsing  sa bagolbagol ni dela Pena. 

Gumikan  sa kakalit  sa hitabo  nagtuo  si dela Pena  nga  nalungag  na  ang  iyang  ulo, apan  maayo  na lang  kay  igo lang napaksit   ang  kilid  niini  agi  sa bala  sa wala  hisayring kalibre  sa armas  de fuego.

Dihang  mibarag  si dela Pena,  mikabad  usab  dayon  og  dagan  ang suspetsado ug  ang  biktima  daling gihatod sa mga kabanay  niini  ngadto  sa  tambalanan.

Nadakpan hinuon dayon ang suspetsado human sa maong   pagpamusil ug kasamtangan  karong gibalhog  sa bilanggoan.

Si PO3 Pinos miingon nga si Senior Superintendent Rey Lyndon Lawas nga maoy direktor sa kapolisan sa maong dakbayan midistino og daghang mga polis nga maoy hinungdan nga ang dautang elemento sama sa mangunguot, manglabnihay ug uban pa wala usab makahuygo sa  pagbinuang  nga  maoy  hinungdan  sa kamalinawon  sa maong  pista. (WC)(BANAT NEWS)