Wa magkadimaong listahan sa senior citizen ipaimbestigar

CEBU, Philippines -  Ipaimbestigar sa konseho ang wala  magkadimaong listahan sa mga senior citizen kung diin ang uban niini ningreklamo gumikan kay nangawala ang ilang pangalan ug nabalakang di makadawat sa ilang allowance karong sunod bulan.

Sa gihimong privileged speech ni Konsehal Rodrigo Abellanosa kagahapon mibutyag nga nakadawat siya og report  bahin sa reklamong nawala ang ilang pangalan sa master list sa  Office of the Senior Citizen Affairs (OSCA).

Giingong usa sa  naapektohan niini mao ang barangay Guadalupe kun diin kapin sa usa ka libo ka mga senior citizen na ang nangawagtang sa lista ug laing 600 sa Barangay Labangon.

Matud pa sa konsehal nga ang maong mga senior citizen nalakip sa karaang listahan sa OSCA apan dako ang ilang kahibulong nga nawala ang ilang pangalan sa kasamtangang master list.

Gihulagway sa konsehal ang maong lakang sa OSCA nga kadudahan kaayo hinungdan nga angay gyud kining imbestigahan.

Hinuon ang mga tinugyanan sa OSCA una nang mipadayag nga makigtagbo sila sa mga barangay sa di pa matapos ang adlaw rong buwana aron mahan-ay ang listahan ug aron masigurong makadawat sa ilang P4mil ang angayang makadawat.

Samtang si Mayor Michael Rama  mitahas na sa Management Information and Computer Services ( MICS) sa syudad nga i-check ang mga computer sa OSCA aron maayo kini kung dunay depekto. (EIM)(BANAT NEWS)