Sa kasaysayan karon - Nobiyembre 21

Unang nakalupad

1783—Niining petsaha nakab-ot sa tawo ang pangandoy nga makalupad o malupigan ang gravity dihang ang professor sa physics ug chemistry nga si Jean Francois Pilatre de Rozier ug Marquis Francois Laurant d'Arlandes nahimong labing unang tawo nga nakabiya sa yuta ngadto sa kahanginan. Luwan sa usa ka giimbento nilang hot-air balloon gikan sa usa ka palasyo sa La Muetttesa Bois de Boulogne, Paris. Sila milupad luwan sa maong balloon sa gilay-ong unom ka milya sulod lang sa 25 minutos ug naabot sa gitas-ong 300 ka tiil. Lakip sa mga misaksi sa maong makasaysayanong hitabo mao ang mismong hari sa France nga si King Louis XVII ug Benjamin Franklin sa Estados Unidos. Una niini si Louis ug Franklin mimandong dili sila Rozier ug d'Arlandes maoy buot nilang pasakyon sa maong balloon gumikan sa kapeligro ug nabalaka silang adunay dautang mahitabo sa duha ka mga professor. Gisugyot sa duha nga duha ka mga bilanggo maoy angay nga pasakyon apan wala mosugot si Rozier tungod kay di niya buot nga makawat gikan kaniya ang garbo ug dungog isip labing unang tawo nga nakahimo pagsupak sa gravity ug nakalupad. Apan una pa ang maong eksperimento ang magsuong Etienne ug Joseph Montgolfier atubangan sa publiko mipakita sa usa ka hot-air balloon niadtong Hunyo 1783 apan walay nagsakay niini ug sa ikaduhang higayon nagpasakay na sila og mga hayop niadtong Septiyembre 1783 aron mahibaw-an kung luwas bang matang sa transportasyon ug mahimo bang mabuhi ang tawo sa ibabaw sa yuta.