MCWD higpitan sa pagpamangag sa dalan

CEBU, Philippines - Gidid-an na sa dakbayan sa Lapulapu ang Metro Cebu Water District (MCWD) nga magbangag sa kadalanan aron maglubong og mga tubo nga walay permit gikan sa siyudad.

Kini gumikan sa reklamo sa mga molupyo sa siyudad ug sa mga motorista nga grabe na ka gubaon ang mga dalan gumikan sa maong mga proyekto sa MCWD nga giingong wala tarunga og balik og semento.

Si Mayor Paz Radaza mipadayag ngadto sa mga tigbalita nga ang pagpunay og kawot ug lubong og tubo sa MCWD maoy nakaguba sa kadalanan sa siyudad nga kinahanglang ayuhon ug dako kining gastos sa habig sa siyudad. Ang mga dalan nga giingong dunay mga proyekto ang MCWD nga nangaguba nahimutang sa sitio Abuno sa barangay Maribago, barangay Agus ug uban pa nga gikatakdang ayohon sa kagamhanan sa maong dakbayan karong Enero sa sunod tuig.

Sa bag-ong patakaran nga buot nga ipatuman sa mayor nga kinahanglang matag 300 metros lang makabangag ang MCWD ug dili tugutang makabangag og lain kung di mahuman ang nahaunang gibangagan.

Traffic  education (Mandatory/Compulsory Traffic Signs)

Give way to all incoming vehicles sign

Kini nagmando sa drayber hatagan og higayon ang mga sakyanan nga mangabot sa atubangan, ang hitsura niini duha ka nagsugat nga 'arrows' diin ang usa gamay itandi sa usa. TIPS: Kini wala magpasabot nga dili na lang ka mopadayon sa imong biyahe, kini nga traffic sign sagad ibutang sa mga dapit diin ang sakyanang ikasugat walay laing kapaingnan kundili ang pagliko sa wala o sa tuo ug duna say sitwasyon nga kinahanglan silang molahos. Bisan asa pa sila padulong kinahanglan silang paunahon og lahos, posibleng ang karga nila mga peligrong kargamento ilabi na duol sa mga chemical plants, military bases ug uban pa. Lahi kini sa Give Way Sign o ba kaha isyu sa Right of Way sign diin subay sa maayong pamatasan ug sa sitwasyon ang naunang naabot nga sakyanan ug kadtong diretso ang rumbo itandi sa moliko maoy paunahon.

(BANAT NEWS)