Mga mga sakyanan sa Brgy nga way for official use only

CEBU, Philippines - Nakadawat og report si Mayor Michael Rama nga dunay mga sakyanan sa barangay ang wala markahi og “for official use only” busa iyaha na nga giawhag ang tanang opisyales sa barangay nga butangan gyud kini og marka kung gusto nila nga magpadayon ang pagdawat nila og gasolina gikan sa siyudad.

Gihatagan sa mayor og usa ka semana ang tanang sakyanan sa barangay sa pagtuman niini ug gimandoan na niya ang General Services Office nga gipangulohan ni Engr. Rolly Ardoza nga moapod-apod na og stickers nga dunay marka “for official use only” ngadto sa mga sakyanan sa barangay.

Matud pa sa mayor nga importante kaayo ang maong tatak aron maseguro gyud nga ang mogamit niini gamiton sa opisyal nga mga lakaw ug dili sa personal nga katuyoan.

“Kung wala’y tatak nga for official use only, wala’y gasolina. Hatagan nako sila og usa ka semana para mobuhat ana,” suma pa sa mayor.

Gawas sa maong marka, giawhag usab niya ang mga opisyales sa barangay nga dili taptapan ang ilang mga red plate.

Matud pa niya nga ang mga opisyales sa barangay maoy modelo ngadto sa ilang mga konstituwente busa dako kaayo kini nga puntos kung sundon nila ang polisiya sa siyudad.

Ang sakyanan sa mayor miplastada gihapon sa plaka niini ug gituparan kini og marka nga “Mayor” aron mao kini ang magamit kung dunay emerhensya ilabi na   kung moresponde kini kung dunay mga kalamidad. (BANAT NEWS)