CEBU, Philippines - Usa ka military grade explosive ang nadiskubrehan sulod sa usa ka fastcraft niadtong Nobyembre 1 apan karun lang bag-o gipahibalo ngadto sa mga awtoridad kalabot sa nakit-an niining bomba. Sa report sa TV5 kagahapon, giingong adunay bomba nga nakit-an sa usa ka fastcraft nga mobiyahe patubang sa Bohol atol sa Adlaw sa mga Santos.
Sumala pa sa maong report ang chiefmate sa maong fastcraft nga mibutyag nga milanat pa og kinse ka adlaw una pa siya nakadesider nga ipahibalo kini ngadto sa iyang kapitan tungod kay wala man siya magdahom nga bomba diay ang sulod sa plastic nga iyang napalgan.
Ang Coast Guard ug ang Port Police nga gikuhaan sa ilang mga habig, nakugang sa maong report tungod kay sila mismo wala magdahom nga malutsan og susamang matang sa bomba tungod sa kahigpit sa ilang gipatumang seguridad.
Ang pantalan atol sa mga susamang selebrasyon higpit nga nagpatuman og seguridad ug ang tanang bagahe iagi gyud sa mga x-ray machines apan gituohang ang nakapalusot niini posibleng may kakunsabong tawo nga wala na magkinahanglan og security check. Ang nadiskubrehang bomba giingong usa ka C4 nga may kaubang detonating wire ug blasting caps nga anaa na karon sa Explosive and Ordnance Division (EOD).
(BANAT NEWS)