Padung sa hearing gipatay

CEBU, Philippines - Patay ang usa ka 50- anyos nga ginang ug swerteng naluwas ang iyang 33- anyos nga anak nga iyaha untang kuyogan nga motambong og husay sa kaso niini dihang gipamusil sa tulo ka mga lalaking nagmotor samtang ang duha nag-atang og sakyanan sa highway sa Sityo Grayrock sa barangay Pangdan sa siyudad sa Naga kagahapon sa alas 6:00 sa buntag.

Ang biktima nga patay diha-diha mao si Margarita Capablanca, 50, nagpuyo sa maong lugar samtang ang iyang anak nga nakalingkawas sa tinong kamatayon mao si Joel Capablanca, 33, nagpuyo sa maong dapit. Samtang ang mga suspek gihulagway lang nga tulo ka mga lalaki nga nag-angkasay sa motorsiklo nga Honda XRM kolor blue nga way plate number.

Matud ni Dondon Ubas ang radio operator sa Naga City Police Station subay usab sa inisyal nga impormasyong nakuha ni PO1 Nilo Dacles padulong motambong sa husay sa kasong attempted murder si Capablanca ug gikuyogan sa inahang namatay sa korte sa dakbayan sa Sugbo.

Apan samtang nagbarogbarog nga nagpaabot og bus nga kasakyan kalit nga miabot ang mga gikatahapan ug ang duha ka angkas diretsong mipusil sa mga biktima. Apan si Joel nga nakabantay daling nakahupo samtang gidemalas ang inahan niini kay maoy nakasalod sa mga bala.

Human niini daling miikyas ang mga mamumuno ug daling gihatud sa anak ug mga tawo ang biktimang si Margarita kinsa nakaangkon og kapin napulo ka samad pinusilan sa lawas ug ulo sa Minglanilla District Hospital apan gideklarar kining patay na.

Lima ka mga basiyo sa kalibre .45 ug .9 millimeter ang nakuha sa kapolisan diha sa crime scene nga gituohang gikan sa armas sa mga mamumuno. Gisusi karon sa kapolisan ang motibong may kalambigitan sa kaso sa anak ang hinungdan sa pagpatay ug gituohang naamong ra niini ang ginang.  (BANAT NEWS)