Mga pamilyang nanukod og balik og balay sa Barangay Luz kasohan

CEBU, Philippines -  Pasakaan gyud og kaso sa duha ka mga homeowners association sa Barangay Luz sa siyudad sa Sugbo ang pipila ka  mga pamilya nga apektado sa demolisyon nga mitukod og balik sa ilang mga balay diha sa dapit diin sila gipapahawa.

Nagkanayon si Konsehal Nida Cabrera kinsa presidente usab sa Nangka Homeowners Association nga tulo ka pamilya sa Sitio Nangka ug Sitio Mabuhay nga miboluntaryo unta sa paguba sa ilang balay apan mitukod og balik  sa ilang dapit ang ilang kasohan.

Aduna pu’y usa ka pamilya nga mitukod og balik og balay diha sa Sitio Lubi.

Kahinumduman nga nangayo og tabang si Cabrera sa kapolisan sa miaging adlaw aron mapatuman ang kahapsay ug kalinaw sa ilang dapit aron badlungon ang maong mga banay.

Kasong contempt of court ang   ilang ipasaka batok  sa nahisgutan nga mga pamilya.

Samtang si Mayor Michael Rama mipasidaan kang Cabrera nga dili magpatuyang og sulti kalabot sa report nga siya maoy nagsulsol sa mga tawo nga mamalik sa ilang giistaran.

Apan si Cabrera sa iyang bahin miklaro nga wala nagikan kaniya ang maong estorya.  

Nasayran nga  32 ka mga pamilya ang gipaubos sa demolisyon diha sa tulo ka mga sityo sa Barangay Luz tungod sa kapakyas nila sa pagbayad sa ilang mga obligasyon sa  mga homeowners association sa maong dapit. (BANAT NEWS)