CEBU, Philippines - Gisupak sa pipila ka mga sektor sa katilingban ang gihan-ay nga ordinansahon ni Cebu 6th District Board Member Thadeo Ouano nga nagtinguha sa pagsagop sa programa ni Gobernador Gwendolyn Garcia nga Expanding Green and Wholesome Environment that Nurtures (e-Gwen) project.
Ang misupak niini mao sila si Atty. Gloria Estenzo-Ramos, Aaron Pedrosa sa Freedom from Debt Coalition Cebu, Carlo Cabatingan sa Youth Against Debt Cebu, Teody Navea sa Sanlakas, Nally Murillo sa Families of Involuntary Disapperance Cebu ug Corazon Amigable sa Kongreso ng Pagkakaisa ng Maralita ng Lungsod Cebu.
Ang maong mga grupo mipadala og sulat ngadto kang Board Member Ouano sa miaging semana nga nagpahimangno niini nga ang pagpalabang sa maong ordinansa makalapas sa Department of Interior and Local Government (DILG) circular
Si Board Member Ouano nga mihangop sa maong mga pagsupak, miingon nga iya kining kinasingkasing nga gidawat ug iyang gipaniguro nga ang tanan nga mga sugyot mahimong mapaminaw unya sa public hearing nga pagahimoon.
Sa iyang bahin si Capitol Consultant Rory Jon Sepulveda miingon nga nagtuo tingali ang maong mga grupo nga nganlan og eGWEN ang national highway.
Sa nasayran ang maong programa nga gilusad niadtong tuig 2008 nakadawat og suporta sa Ramon Aboitiz Foundation Inc. sanglit gitumong man kini sa pag-indigay sa kalungsoran ug mga dakbayan pinaagi sa pagpatahom sa ilang kadalanan pinaagi sa pagpananom og mga nagkalainlaing kahoy sa kadaplinan niini, pagpanglimpiyo sa palibot sa matag barangay ug lungsod ug pagpreserbar sa kultura ug kalikopan. (BANAT NEWS)