CEBU, Philippines - Tulo ka batan-on kinsa nasaypan nga nagbugal-bugal nangabun-og human kulataha sa duha ka lalaki didto sa Brgy. Kamputhaw dakbayan sa Sugbo kagahapon sa kaadlawon.
Ang mga suspetsado mao sila si Bryle Stuart, 21, ug Jahn Clinton Gam, 20, pulos nagpuyo sa Door 3 sa Kimberly Rose Apartment sa La Guardia Extension, barangay Lahug, dakbayan sa Sugbo.
Ang usa sa mga biktima nga si Jacob (di tinuod ngalan), 16, miasoy nga igo lang silang naglakaw daplin sa usa ka hotel sa Gorordo uban sa iyang mga higala aron unta mamalit og pan sa dihang nakita nila ang Volkswagen nga gipanag-iya ni Stuart ug Gam nga gi-parking sa maong dapit. Unya nagdungan sila og panyagit og “pagong pass” dungan sa pagpangatawa hinungdan nga nasuko ang mga suspek ug mikuha og batangas knife sulod sa ilang sakyanan. Tungod sa kahadlok, mikabad sila og dagan pahilayo sa maong lugar apan nadakpan ni Gam ang usa nila.
Matud sa 15 anyos nga si Jake (di tinuod ngalan), nga gialsa siya sa mga suspek ug gibundak sa yuta.
Samtang si Philip (di tinuod ngalan), 16, miingon nga nadakpan siya sa mga suspek ug gitabangan sa pagkulata hinungdan sa pagkabukol ug pagkagisi sa iyang ngabil.
Human siya kulataha, gitanyagan siya nila ni Stuart ug Gam og P1000 kun mosugot kini nga magpabunal og baseball bat apan wa siya mosugot ug misutoy siya og dagan ug mitago sa sulod sa usa ka hotel.
Si Jacob nga usa usab sa mga biktima mibutyag sa kapolisan nga dihang nadakpan siya giligid siya og bunal sa baseball bat .
Maayo na lang kay may tawo nga nakasaksi sa maong pagpamun-og, kinsa maoy nanawag og tanod busa nasikop ang mga suspetsado. Sila si Stuart ug Gam , nagtingkagol na karon sa prisohan sa Fuente Police Station samtang giandam na ang kaso nga isang-at batok kanila. (BANAT NEWS)