HUGS pundok sa namatya’g anak gipaila

CEBU, Philippines - Sa tumong nga kahatagan og laing paglaum ang  mga ginikanan nga namatyan og anak, usa ka organisasyon nga gitawag og HUGS, Support Group for Grieving Parents ang giumol sa grupo sa mga nagpakabanang  ginikanan kinsa nakasinati usab sa maong pait nga panghitabo.

Si Col. Tony Obenza, Presidente sa HUGS atol sa usa ka tigom kagahapon didto sulod sa Mc Donalds sa Jones sa syudad sa Sugbo nagkanayon nga ang maong organisasyon gituyo pag-umol aron pagdasig niadtong mga ginikanan nga namatyan og anak.

Alang  sa  mga hingtungdan lisod kaayo  makalimtan  ang maong  hitabo ug kun walay  motabang  sa pag-am-am  sa  mga  hingtungdan maglisud  kini  pagbangon  aron  manginabuhi  nga  normal.

Dugang pa niya nga kasagaran sa mga namatayan sa ilang mga anak mao kadtong na  dengue, leukemia, diabetes, nalumos.

May biktima sa kidnapping sama  sa nahitabo sa anak ni Renante Pique, amahan ni Ellah Joy Pique nga sa pagkakaron miyembro na sa HUGS.

Giklaro ni Obenza nga ang partikular nga tumong nila sa pag-umol niining maong organisasyon mao nga tabangan ang mga ginikanan nga namatayan og anak nga makabangon pagbalik pinaagi sa Legal Counseling.  Kini usa sa aktibidad usab nila sa ilang grupo nga pangulohan  og usa ka Psychologist.

Buot usab nila nga adunay moabi-abi ug mosabot niadtong mga ginikanan nga nakasinati og pait nga panghitabo sa pagkamatay sa ilang anak.

Sumala pa ni Obenza nga ang HUGS natukod niadtong  2009 nga mao usab ang tuig nga namatay ang iyang anak hinungdan nga  wala  siya maglangan sa pagpangita og miyembro nga mosalmot  ug mosuporta sa HUGS.

   Matud pa usab ni Anne Uy usa usab ka miyembro  sa HUGS nga kining maong organisasyon talagsaon gayud kaayo dili sama sa ubang kapunongan nga nailhan  na  busa  daghan  na nga  misuporta.

Giklaro ni Uy nga sukad matukod ang HUGS may 14 na kini  ka  miyembro karon ug  matag  buwan   moamot  ang matag magtiayon og P300 isip monthly due  alang  sa ilang  mga  galastohan sa  panahon  nga  may kalihokan  silang  ipahigayon.

Gani karong umaabot nga Decembre 9 ning tuiga aduna silay ipahigayon nga Candle Lighting nga magsugod sa alas 7:00 sa gabii didto sa Plaza Independencia sa Sugbo ug kini ipahinungod niadtong mga anak nga mitaliwan na sa laing kalibotan .

Dugang pa ni Uy nga kining umaabot nga kalihokan pagasalmotan sa mga member  sa HUGS sa tibook kalibotan ug ika-tulo na  kini nila  nga pagpahigayon dinhi sa Sugbo samtang ika-16  na kini nga candle lighting sa tibook kalibutan nga pagasalmotan sa 50 ka nasud.

Sumala pa ni Uy nga ang mga ginikanan nga namatayan og anak welcome kaayo nga mosalmot  ug  magsul-ob  sila og puti nga sinina ug itom  nga karsones isip simbolo sa kalinaw.

Gibutyag sa mga opisyales sa HUGS nga kadtong mga ginikanan nga namatayan usab og anak nga gusto magpa-miyembro mokontak lamang kanila pinaagi sa numero nga 4129103/09468211112.  (WC)(BANAT NEWS)