Nasuyaan gipatay

CEBU, Philippines - Patay ang usa ka 19-anyos nga lalaki nga giingong gisulong sa pinuy-anan ug gipusil patay sa kanhi uyab sa iyang kapuyo diha sa Sityo Tapon sa barangay Tinaan siyudad sa Naga kagahapon sa alas 12:30 sa sayong kaadlawon.

Wala na makaabot nga buhi sa tambalanan ang biktimang si Giovanni Flores, nagpuyo sa maong lugar samtang ang suspek mao si Alfredo Geraldizo, 18,  ug kauban niini ang usa ka 17-anyos nga molupyo ra usab sa maong dapit.

Ang kapuyo sa biktima diha sa atubangan niini dihang  nahitabo ang krimen.

Matud ni PO2 Dionisio Trumata sa Naga City Police dihang nahinabi sa Banat News ang biktima ug ang 17-anyos niining kapuyo nag-estorya sud sa gate sa ilang gipuy-an nianang tungora dihang misulod sa gate ang mga suspek ug gikomprontase ang biktima.

Sumala pa nga pwerteng suyaa sa suspek nga gibuwagan kini sa dalaga ug nakigpuyo sa biktima hangtud nga nagkainitay sila sa panaglalis.

Ang suspek kinsa wala makaagwanta giingong mibunot sa gidalang wala matinong kalibre sa armas ug gipusil sa walang bahin sa ilok si Flores. Human niini daling nanagan ang mga suspek gawas sa gate.

Ang kapuyo sa biktima daling nangayo og panabang ug gidala si Flores sa Minglanilla District Hospital apan gideklarar  kini sa mga doktor nga patay na.

Ang kapulisan nagpahigayun pa sa ilang hot pursuit operation sa nakasibat nga duha ka suspek ug love triangle ang gitumbok nga motibo sa krimen.(EIM) (BANAT NEWS)