Pharmacist naghikog
CEBU, Philippines - Nagbitay nang napalgan ang usa ka pharmacist sa iyang katabang diha sa kusina nga bahin sa panimalay pasado alas-4 sa kaadlawon sa dalan Katipunan sa barangay Calamba sa siyudad sa Sugbo.
Ang namatay nailhan nga si Chona Temeña, 53, molupyo sa maong lugar ug giingong usa ka pharmacist.
Sa inisyal nga imbestigasyon sa kapolisan nasayran nga ang katabang sa panimalay sa naghikog nga si Annabelle Pagasian maoy unang nakakita sa agalon nga nagbitay na sa ilang kusina.
Matod pa aduna nay higot nga pisi sa liog nga ang pikas tumoy niini ngadto na sa beam sa kisame ug nagbitay si Temeña dihang napalgan ni Pagasian.
Ang anak sa naghikog nga si Rory Joshua, 23, mibutyag usab nga diha nga iyang nasayran nga naghikog ang iyang inahan dali siyang migawas sa iyang lawak ug daling gibadbaran sa higot ang iyang inahan apan patay na kini.
Gisusi pa karun sa kapolisan kun unsa ang problema sa naghikog nga nakadesider man kini nga magkutlo sa iyang kaugalingon.
Ang kapolisan nga misusi sa lawas sa naghikog walay nakitang timailhan nga adunay foul play sa kamatayon niini. (BANAT NEWS)
- Latest
