CEBU, Philippines - Duha ka gituohang tigpayuhot og drugas lakip na ang giingong usa sa dagkong drug pusher sa tibuok Central Visayas ang nasikop sa operatiba sa Provincial Anti-Illegal Drugs Special Operation Task Group sa gipahigayon nga buy-bust operation niadtong Martes sa gabie sa Barangay Bolinawan, Carcar City.
Nakuha sa duha ka mga suspek ang pipila ka pakete sa shabu nga mokabat ngadto sa P125,000. Gidala na kini sa Philippine National Police Crime Laboratory-7 sa Camp Sotero Cabahug alang sa chemical analysis.
Si Julius Lopez, giingong lider sa Julius Lopez Drug Group nga taga-Sitio Tugas nasikop sa operatiba human nila maaresto si John Lloyd Baritua, taga-Sitio Cambontan. Ang amahan ni John Lloyd nga si Leonedes “Medis” Baritua, mao gyud unta ang subject sa maong operasyon apan nakaikyas kini.
Si Lopez nakuhaan og usa ka dakong pakete sa drugas, boodle money nga adunay P1,000, cellphone, ug awto nga Chevrolet Optra (YHB-605).
Nakuha usab kang John Lloyd mao ang 15 ka gagmay’ng pakete sa drugas, drug paraphernalia, P300 marked money, cellphone, caliber .45 pistol nga adunay tulo ka magazine ug 12 ka bala.
Usa ka semana nga gipanid-an sa kapolisan si Leonedes una pa sila mipahigayon og operasyon anang alas 8:00 sa gabii apan malas lang kay ang anak niini nga si John Lloyd ang nasikop.
Matud ni Insp. Rogelio Amoroso Jr., sa PAIDSOTG, nakalabay pa sa dala niini nga shabu si Leonedes una mikaratil sa pagdagan.
Sa dihang nagpahigayon na og imbentaryo ang operatiba giingong nanawag si Lopez sa cellphone ni John Lloyd ug mihagad nga aduna kini usa ka kilo nga shabu nga umaabot karong Biyernes.
Pinaagi sa cover up operative nakig-transaksyon ang operatiba kang Lopez ug mihangyo nga kinahanglan nila ang shabu anang adlawa ug tuod man misugot si Lopez sa iyang 25 gramos nga shabu.
Ang poseur buyer ug si Lopez giingong nagkita sa Barangay Tugas ug human sa transaksyon giaresto na dayon sa operatiba ang suspek.
Si Amoroso mitug-an nga si John Lloyd usa ka level two drug pusher samtang si Lopez anaa na sa watchlist sa regional headquarters.
Apan sa pakighinabi sa duha ka mga suspek sila mi-deny nga ilaha ang drugas ug matud pa planted kini.
“Planted ang ebidensiya, ako tuod ang cellphone pero dili ako ang nagtransaksyon,” matud ni Lopez.
Si John Lloyd miangkon nga diha niya ang armas apan dili ang drugas.
“Wala man ko mamaligya ako rang papa gibilin ra man na nako wala ko kahibalo nga mao diay nay sulod,” matud niya.
Si Lopez ug John Lloyd anaa na karon sa karsel sa Consolacion Police Station ug mag-atubang og kasong kalapasan sa Sections 5 ug 11 sa Dangerous Drugs Act of 2002 samtang laing kaso nga illegal possession of firearm ang ipasaka kang Lopez. (BANAT NEWS)