Kanser ni Osmeña ayo na

CEBU, Philippines - Nahibalik na sa dakbayan sa Sugbo  si Kongresista  Tomas Osmeña human sa pipila ka adlaw niya nga  biyahe   ngadto sa gawas sa nasud alang sa iyang regular check up  sa lawas  ug  mipasalig  nga  wala  na  mobalik  ang  iyang  kanser sa pantog.

Iyang giklaro   nga himsog  ug baskog  kaayo  ang  lawas karon sukwahi  sa gipatuo  sa iyang  mga  kaatbang  nga siya luya na.

 Gihimakak usab niya ang mitumaw nga mga intriga nga matud pa  nga nagpa-admit siya sa St. Lukes Hospital didto sa kaulohan.

Nagkanayon si Osmeña nga aduna siya’y mga kritiko nga buot motungo  kaniya apan iyang giklaro nga himsog gyud ang iyang panglawas, ug gani mibalik na siya sa pagtambong sa mga pulong-pulong sa nagkadaiya nga barangay.

Nagdumili hinuon ang kongresista sa pagpakita sa iyang medical records human siya  magpa-check up didto  sa gawas  sa nasud.

Kini  tungod  kay  alang  kaniya  ang  usa  ka ebidensya  nga maayo  na  siya  ug  wala  na  mobalik  ang  iyang sakit  mao  ang  kalagsik  sa iyang  lawas  karon.

Matud pa niya nga usa ka desperadong lakang sa iyang mga kritiko ang pasangil nga nibalik ang iyang sakit nga cancer sa pantog. Si Osmeña nakigtigom kagahapon sa iyang mga leader sa mga barangay   ug malipayon niya nga gipahibalo nga pabilin siya nga gihangop sa katawhan .

Dugang pa niya nga sukad pa niadtong 2002  pa siya  giintriga nga matud pa  nagluya na  siya ug himatyon  apan wala gyud siya  mahasol niini. (BANAT NEWS)