CEBU, Philippines - Gitinguha karon sa konseho sa dakbayan sa Sugbo nga himoon nga P15,000 ang Christmas bunos sa kapin sa lima ka libo ka empleyado sa Cebu City Hall .
Nasayran nga P10,000 ra ang nadawat nga bunos sa maong mga empleyado sa nangagi nga mga tuig.
Sumala pa ni Konsehal Lea Japson nga panahon na nga dugangan ang gidak-on sa maong bunos karong panahona aron matagbaw usab og dyutay ang makadawat niini ilabi na sa panahon sa Pasko nga daghan kaayong mga palitonon ang tawo. Samtang nalipay si Mayor Michael Rama sa maong tinguha sa konseho gumikan kay segurado nga malipay pag-ayo ang mga empleyado niini, apan gipasusi niya kun may igo bang pundo ang panudlanan sa siyudad alang niini.
Sayo niini iyang gipadayag nga ganahan gyud siya nga kahatagan og dako-dako nga bunos ang mga empleyado gumikan kay mao na kini ang iyang naandan sukad siya nahimong mayor.
Nagkanayon ang mayor nga adunay natampo ang mga empleyado sa City Hall sa gipatuman niya nga mga programa alang sa katawhan. Naglaum ang mayor nga magpadayon ang maayong pag-alagad sa iyang mga empleyado ngadto sa katawhan ug kinahanglang aduna gyud sila’y dedikasyon sa ilang mga trabaho. (BANAT NEWS)