CEBU, Philippines - Patay nang nadangat ang usa ka langyaw sa tambalanan human nabangga sa nag-parking nga sakyanan ang motorsiklo niining gimaneho didto sa highway sa barangay Basdiot sa lungsod sa Moalboal niadtong Lunes sa alas 5:00 sa hapon.
Ang biktima mao si Samuel Didis Linais,48, French national ug mibakasyon dinhi sa Pilipinas ug kasamtangang nagpuyo sa maong lugar.
Matud ni PO2 John Robert Sacan sa Moalboal Police Station dihang nahinabi sa Banat News miingon nga nagmaneho sa usa ka giabangang motorsiklo ang biktima ug gisakyan paingon sa lungsod.
Apan pag-abot sa maong lugar wala makabantay ang maong langyaw sa nag-parking nga Isuzu Elf sa usa ka telecommunications company nga gi-parking sa daplin sa dalan samtang dunay giayo nga linya ang mga crew nga nagdala niini.
Sumala pa sa imbestigasyon nga mi-overtake si Linais sa gisundang duha ka lalaki nga nagbiseklita ug wala makabantay sa maong gi-park nga trak ug nalahos niini og kadasmag. Tungod sa kakusog sa pagbangga nalagpot ang biktima buwag sa iyang motorsiklo ug nag-una ang ulo pagtugpa sa semento una pa nahapla ug wala nay panimuot.
Gisuwayan pa unta og tabang ang maong langyaw ug gihatud sa Badian District Hospital apan gideklarar nga patay na. (BANAT NEWS)