Joavan 'Namusil'

CEBU, Philippines - Gimando sa hepe sa kapolisan sa Talisay City Police Station ang pagpadakop kang Joavan Fernandez ang anak ni Mayor Socrates Fernandez tungod sa nahitabong pagpamusil sa usa ka gasolinahan sa barangay Bulacao, sa Talisay City, kagahapon sa kaadlawon.

"To all PNP of Talisay Police Stn (Station), arrest Joavan Fernandez if found, and text COP immediately for his whereabout. Suspect shot cashier booth of Shell gas stn last night. ASAP," sumala pa sa text message ni Supt. Eddie Recamara ngadto sa mga sakop. Ang kamandoan gipawas ni Recamara human usa ka pump boys kinsa nahadlok magpaila sa iyang pangalan mibutyag nga miabot si Joavan sa ilang gasolinahan luwan sa usa ka puting Honda CRV aron magpatubil.

Matud pa nila pagkakita nila niini nanulod sila sa convenience store apan giingong kalit nga gipabuthan ni Joavan ang cashier's booth tulo ka higayon.

"Kung wap-a to nidagan og apil ang kahera, patay gyud to ba," matud pa sa usa sa motoristang magpatubil usab unta nianang higayona.

Matud pa sa maong pump boy nga daan na silang gipasidan-an sa tagdumala nga dili pautangon og gasolina si Joavan.

"Natagam nami sa una, hapit man mi niya gilamparo maong nanagan mi," matud pa niini.

Sumala pa sa maong pump boy duna pay utang si Joavan diha sa gasolinahan maong mimando ang tagdumala nga dili na kini pautangon pa. Maong dihang nakit-an nila ang puti nga Honda CRV nga walay plaka nanagan dayon sila sa convenience store ug gibiyaan nila ang ubang mga nagpatubil tungod sa kahadlok nila sa anak sa mayor.

Wala gyud sila masayop tungod kay giingong gipusil ni Joavan ang gasolinahan, tulo ka mga basiyo sa kalibre .45 nga bala ang nakuha diha sa crime scene. Usa sa mga babaye nga diha sa dapit miingon nga nakadungog siya og buto ug mitago nalang kini.

Human sa pagpamusil matud pa niya nakit-an niya si Joavan nga mibiya sa gasolinahan ug milahos sa direksyon sa Barangay Tabunok.

Usa ka Efren Oro, 21, ang misumbong sa hitabo sa Talisay City Police Station ug kini mibutyag nga nasuko si Joavan nga wala siya tubili. Apan si Oro miangkong wala gyud nila makit-i si Joavan sa sulod sa sakyanan tungod kay tinted kini apan nakaila na sila sa maong sakyanan nga maoy sagad gamiton sa anak sa mayor ug nagtuo silang si Joavan ang sakay niini.

Dili lang kini ang unang higayon nga nalambigit sa kontrobersya ang anak sa mayor sa Talisay ilabi na tali sa mga gasolinahan sanglit niadtong nilabay 2010 nakabangi usab niini ug gipasanginlan siyang nanamparos og duha ka pumpboys sa gasolinahan sa Bulacao, hinuon walay kiha nga nahitabo sanglit gibayran sa iyang amahan ang utang nga gasolina apan na-blotter kini sa barangay ug sa kapolisan.

Gipasanginlan usab siya og pagpamusil niadtong 2006 diin usa ang namatay ug duha ang naangol. Ug gipasanginlan usab kining misignit sa duha ka vulcanizing shop helpers kaniadto apan giingong nahilom ra ang kaso. Si Joavan mao karoy gitudlo sa mayor nga pangulo sa Task Force Mananga ug nalambigit usab sa mga humanitarian projects sama sa feeding program sa siyudad. (Liv Campo sa The Freeman/EIM)(BANAT NEWS)