CEBU, Philippines - Gipangandaman sa kadagkuan sa Aviatours ang ipahigayon unya nga inspeksyon sa mga sakop sa Civil Aviations Authority of the Philippines karung umaabot Lunes ug Martes nga diin mahimong dalan unya nga makabalik na sila sa ilang normal nga operasyon human sa trahedya.
Si Capt. Antonio Juriedini ang director sa Aviatours Flight School mibutyag nga giplantsa na nila ang mga gikinahanglang mga dokumento ug rekisitos alang sa maong inspeksyon.
Gani gibutyag ni Juriedini nga anaa na sila sa ikatulong rekisitos nga kinahanglan aron sila makabalik sa operasyon ang ilang mga eroplano human sila masuspenso tungod sa pagkahagsa sa Piper Seneca plane nga giluwanan ni kanhi interior secretary Jesse Robredo.
Gawas kang Robredo nakalas usab sa maong aksidente sa Masbate ang tag-iya sa Aviatours nga si Capt. Jessup Bahinting ug ang Nepalese student pilot nga si Kshitiz Chand.
Subay sa migawas nga report kalabot sa pinal nga resulta sa imbestigasyon nga pilot error ug depektosong makina ang hinungdan sa pagkahagsa nagdumili pa pagkomento ang Aviatours hangtud nga dili nila madawat ang opisyal nga resulta sa report. Samtang sa migawas nga mga balita sa kaulohan, giangkon ni Department of Transportation and Communications (DOTC) Secretary Jose Emilio Abaya nga sagad sa mga impormasyon bahin sa resulta sa imbestigasyon nga mi-leak sa media sakto gawas lang sa pipila ka ginagmay nga sayop, usa na niini ang nag-ingon si Chand ang naa sa bangko ni Bahinting. Ang tinuod, si Bahinting maoy naglingkod sa hustong posisyon.
Gilauman sa Aviatours nga karong unang semana sa bulan sa Disyembre makabalik na sila sa ilang normal nga operasyon. (BANAT NEWS)