Soco ug Belleza nagkumboya pagdonar og puso artesiano

CEBU, Philippines - Gihangop sa   kagatosan ka mga molupyo sa tulo ka mga lugar sa dakbayan sa Talisay ang pagdonar og mga puso  artesiano  ni magpapatigayon Glenn Soco uban ni Talisay City vice mayoralty candidate Aber Belleza niadtong miaging adlaw.

Ang mga lugar nga gipatarokan  ni Soco  og puso  sa tubig  mao ang barangay San Rafael, Sitio Kalinaw-1 ug Sitio Kalinaw-2. Ang coordinator sa maong lugar nga si Alma Sanchez mipadayag   sa tumang kalipay tungod kay makatubag kaayo kini sa ilang panginahanglan sa tubig adlaw adlaw nga dili na sila mahago pagsag-ob  sa layong lugar. Dugang pa niya   nga dugay na nilang gipangandoy nga makabaton og puso   artesiano  ang  ilang  lugar apan karon  lang panahona matuman  ang  maong  damgo.

Matud ni Soco   nga gitubag niya ang maong panginahanglan sa mga molupyo sa maong lugar human kini midangop  kaniya ug nagpatabang sa ilang problema  bahin sa tubig.  Kini  tungod  kay  ang  daan  nila  nga  puso  artesiano naguba ug  wala  na  gyud  mapaayo   kay  wala  silay  kuwarta  ug  wala  usay  nagtagad  sa  pagtabang  kanila.

Si Soco mokandidato kini   sa  pagka -bise  gobernador sa umaabot   nga election  sa 2013  ubos sa Pwersa Ng Masang Pilipino (PMP) party ni kanhi presidente Joseph Estrada.

Sa miaging 2010 election si Soco unang mikandidato pagka- bise gobernador  ni Gov. Gwen Garcia apan napildi   siya ni anhing vice governor Greg Sanchez nga maoy runningmate ni Atty. Hilario Davide III sa Liberal Party (LP)  sa maong  higayon.  Samtang si Belleza mokandidato usab   sa pagka- bise mayor sa dakbayan isip independente  sa umaabot  nga  piniliay. (BANAT NEWS)